ބުރާސްފަތި ދުވަހުގެ ރޭ ހިނގި މާރާމާރީގައި ޒަހަމްވި މީހާ އަށް ބ. އޭދަފުށީ ހޮސްޕިޓަލަށް ގެންގޮސް ފަރުވާދެމުންދާއިރު، "ސީއެންއެމް" އަށް މައުލޫމާތުދެއްވަމުން އޭދަފުށީ ހޮސްޕިޓަލުގެ މީޑިއާ އޮފިޝަލް މީގެ ކުރިން ވިދާޅުވީ، ޒަހަމްވި މީހާގެ ބޮލުގެ ފަސް ތަނަކަށްވެސް އެކިވަރުގެ ޒަހަމްތައް ލިބިފައިވާއިރު، ބަނޑަށް ދީފައިވާ ހަމަލާގަައި ގޮހޮރުވެސް ނިކުމެފަވާ ކަމަށެވެ.
މިއަދު އެ ހޮސްޕިޓަލުގެ އޮފިޝަލަކު "ސީއެންއެމް" އަށް މައުލޫމާތު ދެއްވަމުން ވިދާޅުވީ، އަނިޔާ ލިބުނު އުމުރުން 45 އަހަރުގެ ބަންގްލަދޭޝް މީހާއަށް އިތުރު ފަރުވާ ދިނުމަށް މާލެ ފޮނުވުމަށް ނިންމާފައި ވާކަމަށާއި، އެމީހާގެ ހާލު އަދިވެސް ސީރިއަސް ކަމަށެވެ.
އެމީހާއަށް އިތުރު ފަރުވާ ދިނުމަށް މާލެ ފޮނުވުމަށް ނިންމާފައި ވަނީ އެމީހާ މަސައްކަތް ކުރަމުން އަންނަ ކުންފުނީގެ ފަރާތުން ކަމަށްވެސް އޮފިޝަލް ވިދާޅުވި އެވެ.
މި މައްސަލަ އާއި ގުޅިގެން 43 އަހަރުގެ ބިދޭސީއަކު ވަނީ ހައްޔަރުކޮށްފަ އެވެ. މި މާރާމާރީ ހިނގީ އަދި އެފަޅު ރަށުގައި އެދެމީހުން ތިބީ ކީއްވެ ކަމެއް ސާފެއް ނުވެ އެވެ.
ނަމަވެސް މިފަހަކުން ބިދޭސީންގެ މެދުގައި މާރާމާރީތައް ވަނީ ގިނަވެފަ އެވެ. މިފަދަ މާރާމާރީތަކުގައި އެކަކު އަނެކަކަށް ބޮޑެތި ޒަހަމުތަކެއް ވެސް ލިބެ އެވެ.
