މުލީ ކައުންސިލްގެ ރައީސް ޝަމްއޫން ރަމީޒު ސީއެންއެމްއަށް ވިދާޅުވީ، މި ދިޔަ މަހު ފަހުކޮޅު ރައީސް މުއްޔަށް ކުރެއްވި ދަތުރުފުޅުގައި މި ހިނގާ ސެޕްޓެމްބަރު މަހުގެ ތެރޭގައި ބަނދަރު މަރާމާތު ކުރުމުގެ މަސައްކަތުގައި ސޮއި ކުރެވި އަދި އޮކްޓޫބަރު މަހުގެ ތެރޭގައި އަމަލީ މަސައްކަތް ފެށޭވަރުވާނެ ކަމުގެ ޔަގީންކަން ދެއްވާފައިވާ ކަމަށެވެ.
ސުނާމީގައި މުލީ ބަނދަރަށް ލިބުނު ގެއްލުންތަކަށް 2007 ވަނަ އަހަރު މަރާމާތުތަކެއް ކުރެވުނު ނަމަވެސް ސިމެންތި ވެލި ބަސްތާ ޖަހައިގެން ހަދާފައިވާ ބޭރުތޮށި އެއްވެސް ވަރަކަށް މަރާމާތު ކޮށްފައެއް ނުވެއެވެ. 2020 ވަނަ އަހަރު އަދި 2021 ވަނަ އަހަރު މުލީ ބަނދަރު މަރާމާތު ކުރަން އިއުލާން ކުރެވުނު ނަމަވެސް އެކިއެކި ސަބަބުތަކާހުރެ އެ މަސައްކަތް ކުރެވިފައިނުވާ ކަމަށް ޝަމްއޫން ވިދާޅުވިއެވެ.
ޝަމްއޫން ވިދާޅުވީ، މުލީ ބަނދަރުގެ ބޭރު ތޮށިން ބޮޑު ބައެއް މިހާރު ހަލާކުވެފައިވާ ކަމަށެވެ. އަދި ބަނދަރުގެ އުތުރުކޮޅު ބޭނުން ނުކުރެވޭ ވަރަށް ހަލާކުވެފައިވާ ކަމަށް ޝަމްއޫން އިތުރަށް ވިދާޅުވިއެވެ. އަދި އައްދަށު ވާޓަރު ޝީޓްތައް ދަށުން ވެލިގަނޑު ދަމައިގަނެގެން ގޮސް ޝީޓުތައް އަޑިއަށް ގޮސްފައިވާކަން ފާހަގަކުރިއެވެ.
ރައީސްގެ މި ދަތުރުފުޅުގައި މުލީ ބަނދަރު މަރާމާތުގެ އަމަލީ މަސައްކަތް އަންނަ އޮކްޓޯބަރު މަހުގެ ތެރޭ ފައްޓަވައިދެއްވާނެކަމަށް ވިދާޅުވުމުން ރައްޔިތުންތިބީ ވަރަށް އުންމީދުގައިކަން ކައުންސިލް ރައީސް ފާހަގަ ކުރިއެވެ.
