ފަޅުގައި އަޅަފައި ތިބި ލޯންޗާއި ދޯނި ފަހަރު އެއްގަމަށް ނާރާ ތިބީ ހަމަ ކިރިޔާ އެވެ. ރަށުގެ އިރުމަތި ފަރާތުން އެރި އުދައިގެ ސަބަބުން މީހަކަށް ގެއްލުން ނުވިނަމަވެސް ބައެއް ތަކެއްޗާއި، ގޭގެއަށް ވަނީ ގެއްލުން ވެފަ އެވެ. ގެއަށް ލޮނު ވަނުމުގެ ސަބަބުން އެގެތަކުން މީހުން މިހާރު ވަނީ ހުސްކޮށްފަ އެވެ.
އެރަށުން "ސީއެންއެމް" އަށް މައުލޫމާތު ދިން މީހަކު ބުނީ، ރޭ ދަންވަރު އުދަ އަރަން ފެށުމުން ފުރަތަމަ ހީކުރީ ސުނާމީ އެއް އަރައިގެން އައި ކަމަށެވެ. އެއީ އެ ރާޅު ތަކަކީ އުދައަރާ އިރު އަރާ ރާޅުތަކަށް ވުރެ ވަރުގަދަ ރާޅުތަކަކަށް ވުމުން ކަމަށް އޭނާ ބުންޏެވެ.
މީގެ އިތުރުން މައުލޫމާތު ދިން އެހެން މީހަކު ބުނީ، ރާޅު އެރުމުގެ ސަބަބުން ފަޅުގައި އަޅާފައި ހުރި އޮޑިދޯނު ފަހަރުގެ ވާތައް ކަނޑައިގެން ގޮސް އެއް ދޯނި އަނެއް ދޯންޏާއި ޖެހި ދޯނިތަކަށް ގެއްލުން ވެފައިވާ ކަމަށެވެ. އަދި އޭގެ ތެރޭގައި ހުރި ބައެއް ތަކެއްޗަށްވެސް ބޮޑެތި ގެއްލުންތައް ވެފައިވާކަމަށް އެމީހާ ބުންޏެވެ.
ރޭ މެންދަމު 01:15 ގައި އެރަށް އުދަ އަރަން ފެށިގޮތަށް އުދަ އެރުން ހުއްޓުނީ، ފަތިހު 04:00 ހާއިރު އެވެ.
މިކަމާއި ގުޅިގެން އެރަށު ކައުންސިލްގެ އޮފިޝަލަކު ވިދާޅުވީ، މިހާރު ގޭގެއަށް އަދި އޮޑިދޯނި ފަހަރަށް ގެއްލުން ވި މީހުންގެ ލިސްޓެއް ނެގުމުގެ މަސައްކަތް ކުރަމުން އަންނަ ކަމަށެވެ. އެހެން ނަމަވެސް މޫސުން ގޯސްވުމުގެ ސަބަބުން އެކަމަށް ހުރަސްތަކެއް ކުރިމަތިވެފައި ވާކަމަށް އޮފިޝަލް ވިދާޅުވި އެވެ.
