ތައުލީމީ ނިޒާމު ހަރުދަނާ ކުރުމަށް އެލައިޑުން ކުރަމުން އަންނަ އެންމެ މުހިންމު އެއް މަސައްކަތަކީ "އެލައިޑް އެޑިޔުކޭޝަން ފަންޑް" ގެ މަސައްކަތެކެވެ. އެލައިޑުން ބުނީ އެ ފަންޑުގެ ބޭނުމަކީ ދަރިވަރުންނާއި ޓީޗަރުންނަށް މަންފާކުރުވަނިވި މަސައްކަތްތަކެއް ކުރުން ކަމަށެވެ.
އެލައިޑް އެޑިޔުކޭޝަން ފަންޑުގެ ދަށުން ޖުމްލަ އަށް ޕްރޮޖެކްޓެއް ހިންގުމަށް ކޮންމެ ޕްރޮޖެކްޓަކަށް 25،000 ރުފިޔާ ދިނުމަށް އެ ކުންފުނިން ވަނީ ހަމަޖައްސާފައެވެ.
އެލައިޑުން ބުނި ގޮތުގައި ފަންޑަށް ކުރިމަތިލެވޭނީ ސަރުކާރުން ހިންގާ ޕަބްލިކް ސްކޫލްތަކަށް އެކަނި ކަމަށާއި ކޮންމެ ސްކޫލަކަށްވެސް ހުށަހެޅޭނީ އެންމެ ޕްރޮޖެކްޓެއް ކަމުގައެވެ. މިދިޔަ އަހަރުގެ އެ ފަންޑު ލިބިފައިވާ ސްކޫލްތަކުގެ ބަދަލުގައި މި އަހަރު އާ ސްކޫލުތަކަށް އެ ފުރުސަތު ދިނުމަށް ނިންމާފައިވާކަމަށް އެލައިޑުން ބުނެއެވެ.
އެލައިޑުން ބުނެފައިވަނީ އެޑިޔުކޭޝަން ފަންޑަށް ޝައުގުވެރިވާ ފަރާތްތަކުން ފޯމު ހުށައެޅުމުގެ ފުރުސަތު އަންނަ މަހުގެ 15 ވަނަ ދުވަހުގެ 16:00 އާ ހަމައަށް ހުޅުވާލާފައިވާ ކަމަށެވެ. އެޕްލިކޭޝަން ހުށަހެޅޭނީ [email protected] މެދުވެރިކޮށް ކަމަށް އެ ކުންފުނިން ބުނެއެވެ.
