ރިޔާސީ އިންތިހާބުގެ ކެމްޕޭނަށް ށ. ބިލެތްފަހިއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ޑރ. މުއިއްޒު ވިދާޅުވީ، ބިލެތްފަހީގައި އެއަޕޯޓެއް އެޅުމަކީ ރައީސް ޔާމީނުގެ ވައުދެއް ކަމަށާއި، އަދި އެވައުދުފުޅާއި އެއްގޮތްތަށް އަދި ބިލެތްފަހީގެ ރައްޔިތުންގެ އުއްމީދާއި އެއްގޮތަށް، ވެރިކަމަށް އިންތިހާބުވެ ވަޑައިގެންފިނަމަ، ބިލެތްފަހީގައި އެއަޕޯޓެއް ތަރައްގީ ކޮށްދެއްވާނެ ކަމަށެވެ.
މީގެ ކުރިން ރައީސް ޔާމީނު ވަނީ ބިލެތްފަހީގައި އެއަޕޯޓެއް ތަރައްގީކުރައްވާނެ ކަމަށް ބުނެ ވައުދުވެޑައިގެންފައެވެ. އެހެންނަމަވެސް، އެރަށު ފަޅުތެރޭގައި ހިއްކައިގެން އެއަޕޯޓެއް ތަރައްގީކުރުމުގެ މަސައްކަތް ކުރަމުން އަންނަނީ މިހާރުގެ ސަރުކާރުންނެވެ. ޑރ. މުއިއްޒު ވިދާޅުވީ، އެރަށުގެ ތަރައްގީއަށް އެއްމެ މުހިއްމު ޕްރޮޖެކްޓަކީ އެއަޕޯޓް ކަމަށް ދެކިލައްވާކަމަށާއި، އެހެންކަމަަށްވުމާއެކު، އެ އެއަޕޯޓް ނިންމުމުގެ މަސައްކަތް މަޑުޖެހުމެއް ނެތި ކުރައްވާނެކަމަށެވެ.
ށ. އަތޮޅުގައި މިވަގުތު އެއަޕޯޓެއް އޮންނަނީ އެއަތޮޅު ފުނަދޫގައި އެކަންޏެވެ.
ރިޔާސީ އިންތިހާބުގެ ދެވަނަ ބުރަށް ކުރައްވާ ކެމްޕެއިންގައި މުއިއްޒު މިއަދު ވަނީ ހދ. އަތޮޅުގެ ކުމުންދޫ އާއި ވައިކަރަދު އާއި ނޭކުރެންދޫ އަދި ށ. އަތޮޅުގެ ނޫމަރާ އާއި ގޮއިދު އަށް ވެސް ވަޑައިގެންފަ އެވެ. މި ރަށްރަށުން އެދުނު ކަންކަން ވެސް އޭނާގެ ސަރުކާރެއްގައި ކޮށްދެއްވާނެ ކަމުގެ ޔަގީންކަން މުއިއްޒު ދެއްވި އެވެ.
