މި މަހުގެ 26 ވަނަ ދުވަހު ބޭއްވި އިފްސާ އެވޯޑު ހަފުލާގައި އަޔާދީ ތަކާފުލްއިން ވަނީ "ތަކާފުލް ވިންޑޯ ނުވަތަ ޔުނިޓް އޮފް ދަ އިޔާ" ކެޓަގަރީން ގޯލްޑް އެވޯޑު ހާސިލުކޮށްފަ އެވެ. މިއީ އަޔާދީ ތަކާފުލްއިން މި އެވޯޑު ވިދިވިދިގެން ހާސިލުކުރި ފަސް ވަނަ ފަހަރެވެ.
އަޔާދީ ތަކާފުލްއިން ވަނީ އިފްސާ އެވޯޑު ސީރީޒްގައި މިހާތަނަށް ގިނަ އަދަދެއްގެ އެވޯޑުތަކެއް ހާސިލުކޮށްފަ އެވެ. އެގޮތުން 2017 ވަނަ އަހަރު "ހައްޖު އަދި އުމްރާ ތަކާފުލް" އަށް ލިބިފައިވާ "އިނޮވޭޓިވް ޕްރޮޑަކްޓް އޮފް ދަ އިޔާ" އެވޯޑާއި 2021 ވަނަ އަހަރު "އަހަރެންގެ ހިޔާ" އަށް ލިބިފައިވާ "އިނޮވޭޓިވް ޕްރޮޑަކްޓް އޮފް ދަ އިޔާ" ސިލްވާ އެވޯޑުގެ އިތުރުން 2018، 2019، 2020، 2021 އަދި 2022 ވަނަ އަހަރު "ތަކާފުލް ވިންޑޯ ނުވަތަ ޔުނިޓް އޮފް ދަ އިޔާ" އިން ގޯލްޑް އެވޯޑު ވަނީ ހޯދާފަ އެވެ.
ސްރީ ލަންކާގެ އެޑިއު ކޮންސަލްޓުން އިންތިޒާމް ކުރާ މި އެވޯޑު ހަފުލާއަކީ ސައުތު އޭޝިއާ ސަރަހައްދުގައި އިސްލާމިކް ފައިނޭންސް ދާއިރާ ފުޅާކޮށް، ހިދުމަތް ދިނުމުގައި މުޖުތަމައަށް ފައިދާ ކުރުވަނިވި އީޖާދީ ވިސްނުން ތައާރަފުކުރާ ފަރާތްތަކުން ކުރަމުން އަންނަ މަސައްކަތްތަކުގެ އަގުވަޒަން ކުރުމުގެ ގޮތުން ދެމުންގެންދާ އަހަރީ އެވޯޑެކެވެ.
