ފައިލޭރިއާއަކީ ރާއްޖޭން އެކުގައި ނައްތާލާފައިވާ ބައްޔެކެވެ. އެކަމަކު މި ފަހުން، ބިދޭސީންތަކެއްގެ ގައިން އެ ބަލި އަނެއްކާވެސްވަނީ ފެނިފައެވެ. ކުޅުދުއްފުށިން، 25 ބިދޭސީއަކު ފައިލޭރިއާއަށް ޕޮޒިޓިވް ވީ ފަހުން، ހުޅުމާލޭން ވެސް ފައިލޭރިއާ ކޭސްއެއްވަނީ ފެނިފައެވެ.
ފައިލޭރިއާ ފެތުރެނީ ކިހިނެތް؟
ފައިލޭރިއާ ބަލި ޖައްސާ ޖަރާސީމު ފެތުރެނީ މަދިރީގެ ޒަރީއާއިންނެވެ. އާއްމުކޮށް ފެތުރެނީ، ކިއުލެކްސް ނަމަކަށް ކިޔާ މަދިރީގެ ޒަރީއާއިންނެވެ. މި މަދިރި ރާއްޖޭގައިވެސް އުޅޭ ކަމަށް އެޗްޕީއޭއިންވަނީ ބުނެފައެވެ. ފައިލޭރިއާއަކީ އެހާ ފަސޭހައިން ފެތުރޭ ބައްޔެއް ނޫނެވެ. އެ ބަލި ފެތުރެނީ، ވަރަށް ގިނަ ފަހަރު، ބަލި ޖެހިފައިވާ މަދިރި ހެފުމުންނެވެ. ފައިލޭރިއާ ބަލި ޖައްސާ ކިއުލެކްސް މަދިރި އާއްމު ގޮތެއްގައި ހަފަނީ، ރޭގަނޑު 7-12 އާއި ދެމެދުގެ ވަގުތެއްގައެވެ.
ފައިލޭރިއާ ފެތުރެނީ ކިހިނެތް؟
ފައިލޭރިއާ ޖެހޭ ބައެއް މީހުންގެ ލޭގައި ކުދި ފަނިތަކެއް (މައިކްރޯ ފައިލޭރިއާ) ދައުރުކުރެއެވެ. ފައިލޭރިއާ ޖެހިފައިވާ މީހެއްގެ ގައިގައި މަދިރި ހެފުމުން، ލެއާއެކު މި ފަނިތައް މަދިރީގެ ހަށިގަނޑަށް ވަދެއެވެ. މަދިރީގެ ހަށިގަނޑުނގައި ފަނި އާލާވެ، ބަލި ޖައްސާ ފަނި އުފެދެއެވެ. މި މަދިރިރ ފައިލޭރިއާ ޖެހިފައި ނުވާ މީހެއްގެ ގައިގައި ހެފުމުން، އެ މީހެއްގެ ހަންގަނޑު އެތެރެއަށް ޖަރާސީމު ވާސިލުވެ، ބަލި ޖެހުމުގެ ފުރުސަތު ބޮޑުވެއެވެ.
ފައިލޭރިއާގެ އަލާމާތްތައް؟
ފައިލޭރިއާ ޖެހުމަށް ފަހު އެތައް ދުވަހެއް ވަންދެން އެއްވެސް އަލާމާތެއް ނުފެނި ހުރެދާނެއެވެ. އެހެންނަމަވެސް ޖަރާސީމު ދާނީ، ލިމްފެޓިކް ސިސްޓަމަށް އަސަރު ކުރަމުންނެވެ. ގިނަ ދުވަސްވުމުން، ބައެއް މީހުންގެ އަތް، ފައި އަދި އެހެނިހެން ގުނަވަންތައް ދުޅަވުމާއި ހަންގަނޑު ބޯވުން ފަދަ ކަންކަން ފެނެއެވެ. އަދި މިފަދަ މީހުންނަށް އެހެނިހެން އިންފެކްޝަންތައް ޖެހުން މެދުވެރިވެއެވެ. އަދި އޭގެ ސަބަބުން ހުން އައުމާއި ބައެއް އެހެނިހެން އިތުރު އަލާމާތްތައް ފެނުން އެކަށީގެންވެއެވެ.
ފައިލޭރިއާއިން ރައްކާތެރިވުމަށް ކުރެވިދާނެ ކަންތައްތަކަކީ ކޮބާ؟
ފައިލޭރިއާއިން ރައްކާތެރިވުމަށް ކުރެވިދާނެ ކަންކަމުގެ ތެރޭގައި، މަދިރި ހެފުމުން ރައްކާތެރިވުމަށް މަދިރި ލޯޝަން އަދި މަދިރިގެ ބޭނުން ކުރުމާ، މަދިރި ހެފިޔަ ނުދިނުމަށް ހަށިގަނޑު ބޮޑަށް ނިވާވާނޭ ކަހަލަ ހެދުން އެޅިދާނެއެވެ. އަދި ވައިވެއްދުމަށް ހަދާފައި ހުންނަ ގޮޅި، ފެންލައިޓް، ކުޑަދޮރު ފަދަ ތަންތަނުގައި މަދިރި ދާ ޖެހުން އަދި މަދިރި އުފެދޭ ތަންތަން ނައްތާލުމަކީ ކުރެވިދާނެ ކަމެކެވެ. އާއްމު ގޮތެއްގައި ހުރިހާ މަދިރިއެއްވެސް ފގިނަވާ ވަގުތަކީ ހެނދުނާއި ހަވީރުގެ ވަގުތެވެ.
ފައިލޭރިއާ ބަލި ދެނެގަންނާނީ ކިހިނެތް؟
މައިކްރޮސްކޯޕީ: ރޭގަނޑު 8-2 އާ ދޭތެރޭ ނެގޭ ލޭގައި ކުދި ފަނި (މައިކްރޯ ފައިލޭރިއާ) ހުރިތޯ ބަލަން ކުރެވޭ ޓެސްޓެކެވެ. ބަލި ދެނެގަތުމަށް ރެޕިޑް ޓެސްޓް ކިޓްވެސް ބޭނުން ކުރެވެއެވެ.
މި މައުލޫމާތުތަކަކީ، ހެލްތު ޕްރޮޓެކްޝަން އެޖެންސީން އާއްމު ކުރައްވާފައިވާ މައުލޫމާތެވެ.
