އެ ޔޫނިއަނުން އެކްސްގައި ކުރި ޕޯސްޓުތަކެއްގައި ވަނީ، ކަންނެލި މަސްވެރިން އެންމެ ރަނގަޅަށް އެންވެރިކަން ކުރަމުން އަންނަ އިހުރު ވައްބިންފަރު ކައިރިން ކޮންމެދުވަހަކު މަހާޖައްރާފު ވެލިނަގަމުން އަންނަ ކަމަށެވެ. އެކަމާ ގުޅިގެން، އެ ސަރަހައްދުގެ އެންވެރިކަން "ހަލާކުވެފައިވާ" ކަމަށް އެ ޕޯސްޓުގައިވެ އެވެ.
މި ވީޑިއޯ އިން ފެންނަނީ ހުޅުމާލޭ ތިންވަނަ ފިޔަވަހި ހިއްކުމަށް ބޭނުން ކުރާ "ފިލީޕޯ ބްރޫނެލޭޝީ" ޑްރެޖަރަށް ވެލި ނަގާ މަންޒަރެވެ.
މި ޕްރޮޖެކްޓަށް ބޭނުންވާ ވެލި ނެގުމަށް ކޮންނަން ހުށަހަޅާފަ އޮތް މާލެ އަތޮޅު އިހުރު އަދި ވައްބިންފަރު ރިސޯޓާއި ދިމާލުން ކަނޑުގެ ސަރަހައްދަކީ، ބޮޑު ކަންނެލި މަސްވެރިންގެ ޔޫނިއަނުން ބުނާ ގޮތުގައި އެންމެ ރަނގަޅަށް މަސްވެރިން އެންވެރިކަން ކުރާ އެއް ސަރަހައްދެވެ.
މާލެ ސަރަހައްދުގައި ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލުހޯދައިދިނުމަށް ސަރުކާރުން ކުރިއަށްގެންދާ މަޝްރޫއުތަކުގެ ދަށުން، ހުޅުމާލެގެ ފޭސް 3، ގުޅީފަޅު، ގިރާވަރު ފަޅު އަދި މިފަހުން ފެށި ފުށިދިއްގަރުފަޅު ހިއްކުމުގެ މަސައްކަތް އަންނަނީ ކުރަމުންނެވެ.
