މި ހަރަކާތަކީ މުޅިރާއްޖޭގައި ކުރިއަށް ގެންދާ ހަރަކާތެއްކަމަށާއި އަދި މި ހަރަކާތް ކުރިއަށް އޮތް ހަފްތާގައި ކުރިއަށް ގެންދާނެކަމަށް އެޗްޕީއޭ މައުލޫމާތު ދެއެވެ. އަދި މި ހަރަކާތް ކުރިއަށް ގެންދަނީ އިތުރު ބަޔަކަށް ފައިލޭރިއާ ޖެހިފައި ވޭތޯ ކަށަވަރު ކުރުމުގެ ގޮތުން ކަމުގައި ކަމަށް އެޗްޕީއޭ ބުންނެވެ.
މި ހަރަކާތުގައި ފުރަތަމަ ސާންޕަލް ނެގުމަށް ހަމަޖެހިފައިވަނީ މާލެ އާއި ހުޅުމާލެއިންނެވެ. އޭގެ ފަހުން ގުޅީފަޅާއި ވިލިމާލެއާއި ތިލަފުށީގައިވެސް ސުންކު ނެގުމަށް ހަމަޖެހިފައިވާކަމަށް އެޗްޕީއޭއިން ހާމަކުރެ އެވެ.
އަދި މި ހަރަކާތުގައި އެޗްޕީއޭގެ އަމާޒަކީ ކޮންމެ ދުވަހަކު މަދުވެގެން 70 ސާންޕަލް ނެގުން ކަމަށާއި މި ހަރަކާތަކީ ދިވެހިންނާއި ބިދޭސީންނަށްވެސް ބައިވެރިވެވޭގޮތަށް ކަމަށްވެސް އެޗްޕީއޭއިން ހާމަކުރެއެވެ.
އެޗްޕީއޭއިން ބުނީ ޓެސްޓުކުރުމުގައި އެންމެ ބޮޑަށް އިސްކަންދޭނީ ބިދޭސީ މަސައްކަތްތެރިންނަށް ކަމަށެވެ. އެއީ، މިވަގުތު ރާއްޖޭގައި ބަލި ޖެހިފައި ތިބި 32 މީހުންނަކީ ވެސް ބިދޭސީ މަސައްކަތްތެރިންނަށް ވާތީ ކަމަށް އެ އިދާރާއިން ބުންޏެވެ.
އެ ސްކްރީނިންގައި ބައިވެރިވުމުގެ ފުރުސަތު ދިވެހިންނަށް ވެސް އޮންނާނެކަމަށް އެޗްޕީއޭއިން ބުންޏެވެ. އަދި، ވީހާވެސް ގިނަ މީހުން ޓެސްޓުކޮށް، މި ބަލިން ރައްކާތެރިވުމުގެ ފިޔަވަޅުތައް ވަރުގަދަ ކުރަމުން އަންނަ ކަމަށް އެ އިދާރާއިން ބުންޏެވެ.
"މަދިރިން ރައްކާ"ގެ ނަމުގައި ގައުމީ ހަރަކާތެއް، މުޅި ރާއްޖޭގައި މިދިޔަ ހަފުތާގައި ފަށައި، މާލޭ ސަރަހައްދު ފޮގުކުރުމުގެ މަސައްކަތް އަންނަނީ ކުރިއަށެވެ.
ރާއްޖެއިން މިހާރު ފެންނަމުންދާ ގައިންގަޔަށް އަރާ ބަލިތަކަކީ ރާއްޖެ އެތެރެވާ ބިދޭސީންގެ ފަރާތުން ފެންނަ ބަލިތަކަށްވުމުން ބަލިތައް މަދުކުރުމުގެ ގޮތުން ސަރުކާރުން މިހާރު ވަނީ ރާއްޖެއަށް ބިދޭސީ މަސައްކަތްތެރިން އެތެރެވާއިރު މެޑިކަލް ޗެކަޕް ހަދަންޖެހޭގޮތަށް ނިންމަވާފަ އެވެ.
