މި ބަދަލު ގެނައީ މިއަދު އެކަމަށް ހާއްސަ ރަސްމިއްޔާތެއް ބާވައިގެނެވެ.
އެޗްޑީސީން ހެޑް އޮފީހުގައި މިއަދު ބޭއްވި ރަސްމިއްޔާތެއްގައި، ގާނޫނީ ގޮތުން އެ ކުންފުންޏަށް އަދިވެސް ބޭނުންކުރާ ނަން، "ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)" އަލުން ބޭނުންކުރަން ނިންމައި، ނަން އިއުލާނުކޮށްދެއްވީ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި ކުންފުނީގެ އިސްވެރިންނެވެ.
އެޗްޑީސީ ރީބްރޭންޑްކޮށް، ކުންފުނީގެ ނަން މޯލްޑިވްސް އާބަން ޑިވެލޮޕްމަންޓް ކޯޕަރޭޝަނަށް ބަދަލުކޮށް، ބްރޭންޑް ނަމަކަށް އާބަންކޯ ކިޔަން ނިންމާފައިވަނީ 2021 ވަނަ އަހަރުގައި ކަމަށް އެ ކުންފުނިން ކުރިން ބުނި ނަމަވެސް، ރަސްމީކޮށް ކުންފުނި ރީބްރޭންޑް ކުރިކަން އިއުލާނުކޮށްފައިވަނީ 2023 ވަނަ އަހަރުގެ އެޕްރީލް މަހުއެވެ.
އާބަންކޯގެ ބްރޭންޑިން ތަންފީޒުކުރަން އެ ކުންފުނިން 1.2 މިލިއަނަށް ވުރެ ގިނަ ރުފިޔާ ރުފިޔާ ހަރަދު ކޮށްފައިވެ އެވެ.
އެޗްޑީސީން ފާހަގަ ކުރާ ގޮތުގައި އެ ކޯޕަރެޝަނުން އެންމެ އިސްކަންދޭ ކަމަކީ ތަރައްގީގެ މަސައްކަތްތަކަކީ އިގްތިސާދީގޮތުން ފައިދާހުރި އަދި ތަނުގައި ދިރިއުޅޭ ފަރާތްތަކުން ބަލައިގަންނަ ފަދަ ޕްރޮޖެކްޓްތަކަށް ހެދުމެވެ.
އާބަންކޯގެ ލޯގޯ ނަގައި އަލުން އެޗްޑީސީގެ ލޯގޯ ހަރުކޮށްފައި. -- ފޮޓޯ: އެޗްޑީސީ
އެޗްޑީސީން ބުނީ ކުންފުނީގެ ބްރޭންޑް ނަން "އަރބަންކޯ"ގެ ބަދަލުގައި، ގާނޫނީ ނަން "އެޗްޑީސީ" ބޭނުންކުރަން ނިންމާފައިވަނީ ކޯޕަރޭޝަންގެ ނަމާގުޅޭގޮތުން ކަސްޓަމަރުންނަށް އަރާ އޮޅުންތައް ކުޑަކުރުމަށްކަމަށެވެ. ގާނޫނީ ހައިސިއްޔަތުން ތަފާތު ކަންކަމުގައި މިހާތަނަށްވެސް ބޭނުންކުރަމުން ދިޔައީ، ކުންފުނީގެ ރަސްމީ ނަން އެޗްޑީސީއެވެ.
