މިދިޔަ ހަފްތާގައި ބާއްވަން މަސައްކަތް ކުރި އެފްއޭއެމްގެ އިންތިހާބުގައި ވާދަ ނުކުރަން ނިންމާފައި އޮއްވާ، އެ އިންތިހާބު ކެންސަލްކޮށް އަލުން އިންތިހާބެއް ބޭއްވުމަށް ތައްޔާރުވަމުން ދަނިކޮށް، ބައްސާމް އިއްޔެވަނީ ދެން އިއުލާން ކުރާ އެފްއޭއެމްގެ އިންތިހާބުގައި، ތިންވަނަ ދައުރަކަށް ކުރިމަތިލައްވަފާނެކަން ދޭހަވާ ގޮތަށް ވާހަކަ ދައްކަވާފައެވެ.
ދެން އިއުލާން ކުރާ އިންތިހާބުގައި ވާދަ ކުރައްވާނަންތޯ ސުވާލު ކުރުމުން ސާފު ޖަވާބެއް ބައްސާމް ނުދެއްވަ އެވެ. އޭނާ ވިދާޅުވީ އެކަމާ ބެހޭގޮތުން އަދި ވަކިގޮތަކަށް އޭނާ ނުވިސްނަވާ ކަމަށެވެ. އެކަމަކު މެންބަރު ކްލަބްތަކުން އެދިއްޖެ ކަމުގައިވާނަ ކުރިއަށްދާނެ ކަމުގެ އިޝާރާތެއް އޭނާ ދެއްވި އެވެ.
"އަބަދުވެސް ތަކުރާރުކޮށް އަޅުގަނޑު ފާހަގަކުރާ ކަމެއް އެއީ (އެފްއޭއެމްގެ) މެންބަރު ކްލަބްތަކުން އެދިއްޖެކަމުގައިވާނަމަ އަބަދުވެސް އެ މެންބަރު ކްލަބްތަކާ އެކު ތިބޭނެ ވާހަކަ،" އަލުން އިއުލާން ކުރާ އިންތިހާބަކަށް ކުރިމަތިލައްވާނަން ތޯ ސުވާލުކުރުމުން، ބައްސާމް ވިދާޅުވި އެވެ.
އާ އިންތިހާބުގައި ވާދަކުރާނެ ކަމަށް ދޭހަވާ ގޮތަކަށް ބައްސާމް ވާހަކަ ދައްކަވާފައިވާއިރު، އެފްއޭއެމްގައި ހިންގާފައިވާ ހިޔާނާތާ ގުޅިގެން އޭނާގެ މައްޗަށް ޖިނާއީ ދައުވާތަކެއް އުފުލި ޕާސްޕޯޓްވެސްވަނީ ހިފަހައްޓާފައެވެ.
