އެގްރިކަލްޗާ މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި ވަނީ އެ މިނިސްޓްރީން ވޭތުވެދިޔަ މުއްދަތުގައި ކުރިއަށްގެންދިޔަ މަސައްކަތްތަކާއި، ލިބިފައިވާ ކުރިއެރުންތަކުގެ މައްޗަށް އަލިއަޅުއްވާލައްވާފަ އެވެ.
އޭނާ ފާހަގަކުރެއްވި ގޮތުގައި، ވާޓިކަލް ފާމިން އަކީ، ރާއްޖެ ފަދަ ބިން ކުދި ގައުމުތަކުގައި ދަނޑުވެރިކަމުގެ އުފެއްދުންތައް އިތުރުކޮށް، ކާނާގެ ޔަގީންކަން އިތުރުކުރުމަށް އެންމެ ރަނގަޅު އެއް މޮޑެލް އެވެ. ޕައިލެޓް ޕްރޮޖެކްޓުގެ ދަށުން ވާޓިކަލް ފާމިންގެ މަސައްކަތްތައް ކުރިއަށްގެންދަނީ ހދ. ހަނިމާދޫ އެގްރިކަލްޗަރަލް ސެންޓަރުގަ އެވެ.
ދަނޑުވެރިކަމަކީ ރާއްޖޭގެ އިގްތިސޯދުގެ އެއް ބިންގާ ކަމުގައި ހަދަން ސަރުކާރުން މަސައްކަތް ކުރާއިރު، އެކަން ކާމިޔާބު ކުރެވެން އޮތީ ޒުވާނުން މި ދާއިރާއަށް ވަދެގެން ކަމަށް މިނިސްޓްރީގެ ބޭފުޅުން ވިދާޅުވި އެވެ.
އެގްރިކަލްޗާ މިނިސްޓްރީގެ މި އަހަރުގެ ބަޖެޓަށް އިތުރު 45 މިލިއަން ރުފިޔާ މިހާރުވެސް ވަނީ ސަރުކާރުން އިތުރުކޮށްފައި އެވެ. މިއި ކުރީ އަހަރާ ބަލާއިރު ދައުލަތުން ދަނޑުވެރިކަމަށް ދޭ ބަޖެޓާއި ބަލައި އެތަށް ގުނައެއް ބޮޑު ބަޖެޓެކެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ މިނިސްޓްރީގެ ޑިރެކްޓަރު އަލީ އާމިރު ވިދާޅުވީ، ރާއްޖޭގައި ދަނޑުވެރިކަން ފުޅާކުރުމަށް ވިސްނާއިރު، ބިމުގެ ވަސީލަތް ކުޑަ ކަމަށެވެ. އެހެންކަމުން އޭގެ ބަދަލުގައި ދަނޑުވެރިކަމުގެ އުފެއްދުންތެރިކަން އިތުރު ކުރެވޭނެ ގޮތްތައް ހޯދަން ޖެހޭ ކަމަށް ވިދާޅުވި އެވެ.
އާމިރު ވިދާޅުވީ ވާޓިކަލް ފާމިންގެ ޕައިލެޓް މަޝްރޫއުގެ ތެރެއިން ތަފާތު އެކިކަހަލަ މޮޑަލްތައް ތަޖުރިބާ ކުރުމުގެ މަސައްކަތް ވަނީ ފެށިފައި ކަމަށެވެ. އެ މަސައްކަަތް ކުރަމުންދަނީ ހަނިމާދޫ އެންރިކަލްޗާ ސެންޓަރުގައި ކަމަށެވެ.
