މައިލޯ ތުރީ އޮން ތުރީ ރަމަޟާން ޗެލެންޖް 2024 ގެ ސީނިއަރ ބައިގެ ޗެމްޕިއަންކަން ހޯދީ އިންކްޑް އާއި ދަ ބައުސްއިންނެވެ. ސީނިއަރ ފިރިހެން ބައިގެ ޗެމްޕިއަންކަން ދަ ބައުސްއިން ހޯދީ ފައިނަލް މެޗުގައި ޝޫޓާސްއާ ވާދަކޮށް 21-18 ޕޮއިންޓުން މެޗު ކާމިޔާބުކޮށްގެންނެވެ. އަދި ސީނިއަރ އަންހެން ބައިގެ ޗެމްޕިއަންކަން އިންކްޑްއިން ހޯދާފައިވަނީ ފައިނަލް މެޗުގައި ރައިސް އަތުން 16-9 ޕޮއިންޓުން މޮޅުވެގެންނެވެ.
15 އަހަރުން ދަށުގެ ފިރިހެން ބައިގެ ފައިނަލް މެޗު ކާމިޔާބުކޮށް، ޗެމްޕިއަންކަން ހޯދީ ވޮރިއާސްއެވެ. އެ ޓީމުން ޗެމްޕިއަންކަން ހޯދީ ޒާކިން އެފްސީއާ ވާދަކޮށް 12-9 ޕޮއިންޓުން މެޗު ކާމިޔާބުކޮށްގެންނެވެ. އަދި މި އުމުރުފުރާގެ އަންހެން ބައިގެ ޗެމްޕިއަންކަން ޖޭޑުން ހޯދިއިރު، ފައިނަލުގައި އެ ޓީމު ވަނީ 8-5 ޕޮއިންޓުން މަމްބާ ބަލިކޮށްފައެވެ.
18 އަހަރުން ދަށުގެ ފިިރިހެން ބައިގެ ފައިނަލް މެޗު ކާމިޔާބުކޮށް، ޗެމްޕިއަންކަން ހޯދީ ވޫ-ޓަންގް އިންނެވެ. އެ ޓީމުން ވަނީ ފައިނަލުގައި އެއާބޯލާސް އަތުން 12-7 އިން މޮޅުވެފައެވެ. އަދި މި އުމުރުފުރާގެ އަންހެން ބައިގެ ފައިނަލުގައި 17-12 ޕޮއިންޓުން ސްވިފްޓީސް ބަލިކޮށް ޗެމްޕިއަންކަން ހޯދާފައިވަނީ ޕަވާޕަފް ގާލްސްއެވެ.
ތުރީ އޮން ތުރީ ރަމަޟާން ޗެލެންޖުގައި މި އަހަރު ހަތަރު ކެޓަގަރީއެއްގައި ޖުމްލަ 81 ޓީމު ވަނީ ވާދަކޮށްފައެވެ.
