ސްޓެލްކޯއިން ނެރުން ނޫސް ބަޔާނެއްގައި ބުނެފައިވަނީ ގްރޭޓާރް މާލެ ސަރަހައްދުގައި ހިމެނޭ ސިޓީތަކަށް ކަރަންޓު ދިނުމަށް އެ ކުންފުނިން އަޅާފައިވާ 132 ކިލޯ ވޯޓްގެ ކޭބަލްތަކުގެ މައްޗަށް އެކި ފަރާތްތަކުން ޕްރޮމޯޝަނަލް ބިލްބޯޑް ހަރުކުރުމަށް ދަގަނޑު ޖަހަމުން އަންނަކަމަށް ފާހަގަ ވަމުން އަންނަ ކަމަށެވެ.
އެ ކުންފުނިން ބުނީ މިއީ އެއް ސަބްޝްޓޭޝަން އިން އަނެއް ޝްޓޭޝަން 200 މެގަ ވޯޓް ކަރަންޓު ގެންދިއުމުގެ ގާބިލްކަން ލިބިގެންވާ ސަރުކާރުން ހަރަދުކޮންގެން ހަމަ އެކަނި ހަދާފައިވާ ވިއުގަ ކަމަށާއި މި ވިއުގައަށް ގެއްލުން ލިބޭނެ ފަދަ ކަމެއް ކުރުން ބަލައި ނުގަނެވޭނެ ކަމަށެވެ.
މިކަމާއި ގުޅުން ހުރި ހުރިހާ މައުލޫމާތެއް ކަމާއި ގުޅުން ހުރި ފަރާތަކަށް ލިބިގެންގޮސްފައިވާނެ ކަމަށާއި އެހެން ކަމުން މި ފަދަ ކަންކަމަށް ހުއްދަ ދޫކުރާއިރު ޒިންމާދާރު ކަމާއި ފަރުވާތެރިކަމާއި އެކު ދޫކުރުމަށް ސްޓެލްކޯއިން ބުނެ އެވެ.
ސްޓެލްކޯއިން ބުނީ މި ވިއުގަ މާލެ ސަރުހައްދަށް ކަރަންޓު ފޯރުކޮށްދިނުމަށް މުހިންމު ރޯލެއް ކުޅޭ ކަމަށާއި މި ވިއުގެ އެއްވެސް ކޭބަލް އަކަށް ގެއްލުންވެއްޖެ ނަމަ މާލެ ސަރަހައްދަށް ކަރަންޓު ދޫކުރުމަށް ހުރަސްތަކެއް ކުރިމަތި ވުން އެކަށީގެންވާ ކަމަށާއި މިި ވިއުގައަށް ގެއްލުމެއް ލިބިއްޖެ ނަމަ އެކަން ހައްލުކުރަން ވަރަށް ވަގުތު އަދި ފައިސާ ހޭދަ ވާނެ ކަމަށް އެ ކުންފުނިން ބުންޏެވެ.
އެހެން ކަމުން މި ވިއުގަ އަށް ދަގަނޑު ހަރައިގެން އެ ވިއުގަގެ ކޭބަލް އަށް ގެއްލުންވެއްޖެ ނަމަ އެ ކަން ކުރާ ފަރާތަކަށް ދައުވާކޮށް އެ ކަމުގެ ސަބަބުން ލިބޭ މާލީ ގެއްލުމުގެ ބަދަލު ހޯދުމަށް ކުރަންޖެހޭ މަސައްކަަތް އެ ކުންފުނި ކުރާނެ ކަމަށް އެ ކުންފުނިން ބުންޏެވެ.
