މަޖިލިސް އިންތިހާބުގައި ލ އަތޮޅުން ލިބުނު ކާމިޔާބީ ފާހަގަކުރަން މިއަދު ހަވީރު ފޮނަދޫގައި ބޭއްވި އެއްވުމެއްގައި ވާހަކަ ދައްކަވަމުން ފައިސަލް ވިދާޅުވީ ފޮނަދޫއާއި ގަން ސިޓީއަކަށް ބަދަލުކޮށް ފެންވަރު ރަނގަޅު ހިދުމަތް ލިބޭ ގޮތަށް މުޅި އަތޮޅު ތަރައްގީ ކުރައްވާނެކަމަށެވެ.
ވަޒީރު ވިދާޅުވީ ގަމާއި ފޮނަދޫ ތަރައްްގީކޮށް އެ ސިޓީގައި ޒަމާނީ ހޮސްޕިޓަލާއި ކުޅިވަރު ކުޅޭނެ ވަސީލަތްތައް ގާއިމުކުރާނެކަމަށެވެ. އަދި ބޯހިޔާވަހިކަމުގެ މައްސަލައަށް ވެސް ހައްލު ހޯދާ ދެއްވާނެކަމަށް ފައިސަލް ވިދާޅުވިއެވެ.
ލ. އަތޮޅަށް ގެންނަވާ ތަރައްގީގެ ވާހަކަ ދައްކަވަމުން ފައިސަލް ވިދާޅުވީ ފަތުރުވެރިކަން އެ އަތޮަޅަށް ގެނައުމުގެ ގޮތުން ވަން އައިލެންޑް ކޮންސެޕްޓަށް ހަތަރު ރިސޯޓު ތަރައްގީކޮށްދެއްވާނެކަމަށެވެ. އަދި މިކަމުގެ މަޝްވަރާތައް ބޭރުގެ ފަރާތްތަކާއި އެކު ކުރަމުން އަންނަކަންވެސް ފައިސަލް ފާހަގަކުރެއްވިއެވެ. އެގޮތުން ކުރިއަށް އޮތް ހަފުތާއެއްގެ ތެރޭ ދުބާއީގެ އިންވެސްޓަރެއްގެ ކުންފުންޏަކާއެކު މަޝްވަރާކޮށް ލ. އަތޮޅުން ރަށެއް ފަތުރުވެރިކަމަށް ކުއްޔަށް ދޭނެކަމަށެވެ.
ލ. ފޮނަދޫގެ ގޮނޑި ކާމިޔާބު ކުރެއްވި އަބްދުއްރަހީމް އެ ގޮނޑި ކާމިޔާބު ކުރެއްވީ ބޮޑު ތަފާތަކުންނެވެ.
