ދަައުލަތުގެ އެއްބާރުގެ ވެރިޔާއަށް ބައްޕާފުޅު އަބްދުއްރަހީމް އަބްދުﷲ ވެވަޑައިގަންނަވާތީ ޓޫރިޒަމް މިނިސްޓަރު އިބްރާހީމް ފައިސަލް ޖަޒްބާތީ ޕޯސްޓެއް ކުރައްވައިފި އެވެ.
Advertisement
ރައީސް ޑރ.މުހައްމދު މުއިއްޒު ވަނީ 20 ވަނަ މަޖިލިސް ގެ އިންތިހާބި މެމްބަރުންނާއި ބައްދަލުކުރައްވާފައެވެ. މި ބައްދަލުވުމުގައި ރައީސް މުއިއްޒު، ފޮނަދޫ ދާއިރާގެ އިންތިހާބީ މެންބަރު އަބްދުއްރަހީމް މަޖިލިސްގެ ރައީސްކަމަށް ހުށަހަޅުއްވާފައިވާއިރު ހުރިހާ މެމްބަރުންވެސް ވަނީ މިކަމަށް އެއްބަސްވެވަޑައިގަންނަވާ ތާއީދުކުރައްވާފައެވެ.
އަބްދުއްރަހީމް މަޖިލީހުގެ ރައީސްކަމަށް ކަށަވަރުވުމާއިއެކު ޓޫރިޒަމް މިނިސްޓަރު އިބްރާހީމް ފައިސަލް ވަނީ ފޭސްބުކް ޕޯސްޓެއްގައި ބައްޕާފުޅުގެ ހަޔާތްޕުޅަށް ބައްލަވާލައްވާ، މިހިސާބަށް ބައްޕާފުޅު އަބްދުއްރަހީމް އައުމަށް ކުރެއްވި ބުރަ މަސައްކަތުގެ މައްޗަށް އަލިއަޅުއްވާލާފަ އެވެ.
"އަހުރެންގެ ބައްޕަ އަބްދުއްރަހީމް އަބްދުއްالله އަކީ 20 ވަނަ ރައްޔިތުންގެ މަޖިލީހުގެ ރައީސް ކަމުގައި ކަނޑައަޅައިދިނުމަށް ޕީއެންސީ ގެ އިންތިހާބީ މަޖިލީސް މެމްބަރުންގެ އަރިހުގައި ޕާޓީގެ ރައީސް އަދި ޤައުމުގެ ރައީސް ޑރ މުހައްމަދު މުއިއްޒު އެދިވަޑައިގެން އެ އެންމެ ބޭފުޅުން އެކަމަށް އިއްތިފާގުވެ މިއަދު ނިންމެވި ހަބަރު އަހުރެން އެއީ ނުހަނު އުފަލާއެކުގަ އެވެ. ހާއްސަ ކޮށް ރައީސް ޑރ މުއިއްޒުއަށް ނުހަނު ލޭފަވެތި ޝުކުރެެއް އަދާ ކުރާ ހާލު އެންމެ ބޭފުޅުންނަށް ހިތުގެ ފުންމުނިން ހެޔޮދުއާ ކުރަމެވެ" ފައިސަލް ވިދާޅުވި އެވެ.
އެ ޕޯސްޓްގައި ފައިސަލް ވަނީ ބައްޕާފުޅު އަބްދުއްރަހީމްއަކީ އާދަޔާއި ހިލާފު އިންސާނެއްގޮތުގައި ސިފަކުރައްވާފައެވެ. މާލެއަށް ކިޔަވަން އައިސް، އެތަކެއް ތަކުލީފުގައި އުޅުއްވުމަށްފަހު ޒުވާންއުމުރުގައި ވަޒީފާއަށް ނިކުމެ ޒަވާޖީ ހަޔާތެއް ފެއްޓެވި އަބްދުއްރަހީމްއަކީ އަތޮޅާއި ރަށަށްވެސް ގިނަ ގުނަ ހިދުމަތްތައް ކުރެއްވި ބޭފުޅެއްކަން ފައިސަލް ވަނީ ޕޯސްޓްގައި ފާހަގަކުރައްވާފައެވެ. ބައްޕާފުޅު މަސައްކަތްކުރެއްވީ ހިތްވަރު އެލުވާނުލާ، ފަހަތަށް ފިޔަވަޅެއް ނާޅާ، ނުހަނު ވަރުގަދަ ޢަޒުމާ ގަދަ ހިތްވަރާއި އެކު ކަމަށްވެސް ފައިސަލް ފާހަގަކުރެއްވި އެވެ.
"ގައުމަށް ހިދުމަތް ކުރުމުގައި، ވެރީންނަށް ކިޔަމަންތެރިކަމާއެކު ލައްބައޭ ބުނެ 24 ގަޑިއިރު މަސައްކަތުގައި އުޅެނިކޮށް، އެންމެ ފަހަރަކު ނޫނެކޭ ބުނުމުން ސިޔާސީ ރޭވުމުން ވައްކަން ބޮލުގައި އަޅުވާ އަރުވާލިއެވެ. ކުދި ދަރިންކޮޅެއް މަޔަކާއި އެކު ނިކަމެތިވެ ބިކަވެދިޔަދުވަސްތަކުންވެސް ބައްޕަ ހާސިލް ކުރީ އިބްރަތެވެ. ގުޑުވާނުލެވުނީ އެ ވަރުގަދަ ހިތްވަރާއި ސާބިތުކަމެވެ" ފައިސަލް ވިދާޅުވި އެވެ.
20 ވަނަަ މަޖިލީހުގެ ރައީސްކަން ބައްޕަ ހޯދެއްވުން އެއީ ބައްޕާފުޅު އަބްދުއްރަހީމްގެ ސިޔާސީ ތާރީގުގައި ހޯއްދެވި ވަރުގަދަ ޖާގައެއްކަމަށް މިނިސްޓަރު އިބްރާހީމް ފައިސްލް ވަނީ ފާހަގކުރައްވާފަ އެވެ.
"ރާއްޖޭގެ ވެރިކަމުގެ ތިންބާރުގެ ތެރެއިން އެއްބާރުގެ ވެރިޔަކަށް الله އިރާދަފުޅާ އެކު އެންމެ ބޮޑު އަގްލަބިއްޔަތަކުން ހޮވޭނެ މަޖިލީހުގެ ރައީސް އަކީ ލ.ފޮނަދޫ އަރާއިރު އަބްދުއްރަހީމް އަބްދުއްالله އެވެ. ސިޔާސީ ހިސާބުޖެހުމުގައި މިއިންޒަމާނަކުފެނިފައިނުވާ ފަދަ މުހަައްނިކެވެ" ބައްޕާފުޅަށް އޮތް ލޯބި ޓޫރިޒަމް ބަންޑުންކޮށްލައްވަމުން ފައިސަލް ވިދާޅުވި އެވެ.
މީގެ އިތުރުން އެފަދަ އުފާވެރި ހިނދުކޮޅެއްގައި ބައްޕަގެ ކާމިޔާބީ ލޮލުން ދެކި އަތުން ހިފަން ލިބުމަކީ ދޮށީ ފިރިހެން ދަރިއަކަށް ބޮޑު ފަހުރުވެރިކަމެއް ކަމަށާއި ބަޔާން ކޮށްދޭންވެސް ދަތިކަމެއްކަމަށް ފައިސަލް ވިދާޅުވި އެވެ.
"ބައްޕާއެވެ! އައްސަރިބަހާއި ސާބަހެވެ. ތިޔަ ކުރެއްވި ހިތްވަރާއި ތިޔަވީ ޤުރުބާނީ އަށް އަދި ތިޔަ ހޯއްދެވި ކާމިޔާބީ އަށް ފަށްފަށުން ސެލިއުޓް ކުރަމެވެ. ރައީސް މުޢިއްޒު އަށާއި ދިވެހި ލޮބުވެތި ރައްޔިތުންނަށް ނުހަނު އަދަބުވެރިކަމާ އެކު ޝުކުރުދަންނަވަމެވެ. ފޮނަދޫ ދާއިރާ ގެ ލޮބުވެތި ރައްޔިތުންނަށް ހިތުގެ ފުންމިނުން ޝުކުރުދަންނަވަމެވެ" ފައިސަލް ވިދާޅުވި އެވެ.
އަބްދުއްރަހީމް ފޮނަދޫ ދާއިރާގެ ގޮނޑި ކާމިޔާބު ކުރައްވާފައިވަނީ އެ ދާއިރާގެ އިތުރު 4 ކެންޑިޑޭޓުންނާ ވާދަކުރައްވާގެންނެވެ. 20 ވަަނަ މަޖިލީހަށް އިންތިހާބުވި މެމްބަރުން ހުވާކުރެއްވުމަށް ހަަމަޖެހިފައިވަނީ މި މަހުގެ 28ގައެވެ.
