ދަނޑުވެރިންނަށް ދިން މި 100،000 ޔޫއާންގެ ތަކެއްޗަކީ 200،000 އެއްހާ ދިވެހި ރުފިޔާއެވެ. އެތަކެތީގެ ތެރޭގައި ދަނޑުވެރިންނަށް ބޭނުން ކުރެވޭނެ މެޝިަނަރީ އާއި ޓެސްޓް ކިޓްތައް ހިމެނެއެވެ.
މިތަކެއްޗާއި ހަވާލުވެ ވަޑައިގެންނެވީ އެގްރިކަލްޗާ އަދި އެނިމަލް ވެލްފެއާ މިނިސްޓަރު ޑރ އައިޝަތު ރަމީލާއެވެ.
މިތަކެތި ހަވާލުކުރީ މިއަދު ހެނދުނު މީރުމާގައި ކުރިއަށްދިޔަ މޯލްޑިވްސް- ސިޝުއާން ޓްރޭޑް އެންޑް އިންވެސްތްމެންޓް ކޮންފަރެންސްގެ ތެރެއިންނެވެ.
މިއަދުގެ މި ކޮންފެރެންސްގައި މިނިސްޓަރު ރަމީލާގެ އިތުރުން ފިނޭންސް މިނިސްޓަރު ޑރ. މުހައްމަދު ޝަފީގް، އިކޮންމިކް މިނިސްޓަރު މުހައްދު ސައީދު އަދި ސަރުކާރުގެ އިސްވެރިންނާއި ވިޔަފާރިވެރިން ބައިވެރިވަޑައިގަތެވެ.
މި ކޮންފެރެންސްއަކީ ފްރީ ޓްރޭޑް އެއްބަސްވުމާއެއްގޮތަށް ދަނޑުވެރިކަމާއި، ޓޫރިޒަމް އަދި އިމްޕޯޓް އެކްސްޕޯޓް އާ ގުޅުންހުރި ރާއްޖޭގެ ވިޔަފާރިވެރިންނާއި ޗައިނާގެ ވިޔފާރިވެރިން ގުޅުންބަދަހިކޮށް ކަންކަން ހައްލުކޮށް މަޝްވަރާކުރުމަށް ބޭއްވިގެންދިޔަ ކޮންފަރެންސްއެކެވެ. ފްރީ ޓްރޭޑް އެގްރީމަންޓް އާއި އެއްގޮތަށް އަމަލުކުރަން ނިންމަާފައިވަނީ އަންނަ ސެޕްޓެމްބަރު މަހުން ފެށިގެންނެވެ.
މިކޮންފަރެންސްގައި ވާހަކަދައްކަވަމުން މިނިސްޓަރު ސައީދު ވަނީ ޗައިނާ އާއި ދެެމެދު އޮތް ގުޅުން އިތުރަށް ބަދަހިކުރަން އުއްމީދުކުރައްވާކަމަށް ވިދާޅުވެފައެވެ. އަދި ރާއްޖޭއަށް ދިމާވެފައިވާ ޑޮލަރުގެ މައްސަަލަ ހައްލުކުރުމުގެ ގޮތުން ޗައިނާ އާއި ރާއްޖެއާ ދެމެދު ޔޫއާން އާއި ރުފިޔާ ބޭނުންކުރަން މިއަދު ވަނީ ނިންމަވާފައެވެ. އަދި ކޮންފަރެންސްގައި މިނިސްޓރު ދެއްކެވި ވާހަކަފުޅުގައި ރާއްޖޭގައި ޗައިނާގެ ބޭންކް އެއް ގާއިމްކުރުމަށްވެސް ނިންމަވާފައިވެއެވެ.
