އިމާމުންގެ މަހާސިންތާ ނިންމުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އިމާމުންގެ އިންޝުއަރަންސް ސްކީމްގެ އަންނަ ހަފްތާގައި ތައާރަފުކުރާނެކަމަށެވެ. އެގޮތުން މި ސްްކީމް ފުރަތަމަ ހުޅުވާލަން ގަސްދުކުރަނީ އިމާމުންގެ ތެރޭގައި ތިބި ބޮޑެތި ބަލިތަކަށް ފަރުވާ ހޯދަމުން ގެންދާ އިމާމުންނަށް ކަމަށެވެ.
މިކަމާއި ގުޅިގެން އިންޝުއަރަންސް ކުންފުނިތަކާއި އެކު މަޝްވަރާ ކުރެވިފައިވާކަމަށާއި މި ސްކީމް އަންނަ ހަފްތާގައި ފެށުމަށް މަސައްކަތް ކުރަމުން އަންނަކަމަށް މިނިސްޓަރު ޝަހީމް ވިދާޅުވިއެވެ. މިނިސްޓަރު ވިދާޅުވީ މި ސްކީމުން ބޭސްފަރުވާ ކުރާނީ އާސަންދައިން ލިބޭ ހިދުމަތްތަކުގެ އިތުރުންކަމަށެވެ.
އިމާމުންގެ މަހާސިންތާ 2024ގައި ރާއްޖޭގެ އެކި ކަންކޮޅުތަކުން އިމާމުން ބައިވެރިވެފައިވާކަމަށް އިސްލާމިކް މިނިސްޓްރީން ބުނެއެވެ. މި މަހާސިންތާގައި ޖުމްލަ 620 އިމާމުން ބައިވެރިވިކަމަށްވެސް މިނިސްޓްރީން ބުނެއެވެ.
