އާ ޓަމިނަލް ހުޅުވުމުން ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބިގެންދާނެ ކަމަށްވެސް އޭނާ ފާހަގަކުރެއްވިއެވެ.
ދުނިޔޭގެ ފަތުރުވެރިކަމުގެ ދުވަހުގެ މުނާސަބަތުގައި ދެއްވި މެސެޖުގައި މިނިސްޓަރު ވިދާޅުވީ، ފަތުރުވެރިކަމަށް އެންމެ ބޮޑަށް ބޭނުންވަނީ ވެލާނާ އެއާޕޯޓުގެ އާ ޓާމިނަލް އޮޕަރޭޝަނަށް އައުން ކަމަށެވެ. މަސައްކަތްތައް ކުރިއަށްދާގޮތަށް ބަލާއިރު، ޑިސެމްބަރުމަހުގެ ތެރޭގައި އާ ޓާމިނަލް އޮޕަރޭޝަނަށް ގެނެވޭނެ ކަމަށް އުއްމީދުކުރައްވާ ކަމަށް ވަޒީރު ވިދާޅުވިއެވެ.
އާ ޓަރމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރެވޭ 78 ހާސް އަކަ މީޓަރުގެ ޒަމާނީ ވަސީލަތްތަކާ އެކު ހެދޭ ޓަރމިނަލެކެވެ. މިއީ މިހާރު ބޭނުންކުރާ ޓަރމިނަލަށްވުރެ ފަސް ގުނަ ބޮޑު ހިދުމަތެކެވެ.
މިނިސްޓަރު އިތުރަށް ވިދާޅުވީ، އާ ޓާމިނަލް ހުޅުވުމާއެކު ރާއްޖެއަށް އިތުރު އެއަރލައިންތަކުގެ ދަތުރުތައް ފެށުމަށް މަސައްކަތްކުރާނެ ކަމަށެވެ. އަދި މާކެޓިން ހަރަކާތްތައް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާ ގުޅިގެން އިތުރަށް ކުރިއަށް ގެންދިއުމަށް ރާވާފައިވާ ކަމަށްވެސް ވިދާޅުވިއެވެ.
ފަތުރުވެރިކަމުން ދައުލަތަށް މިހާރު ލިބޭ 4.5 ބިލިއަން ޑޮލަރު، 2027 ވަނަ އަހަރާ ހަމައަށް 6 ބިލިއަން ޑޮލަރަށް އިތުރުކުރުމަކީ ސަރުކާރުގެ އަމާޒެއް ކަމަށްވެސް މިނިސްޓަރު ފާހަގަކުރެއްވިއެވެ.
