މި މައްސަލާގައި ހުކުމް އިއްވާގައިވަނީ އައްޑޫ ސިޓީ ހިތަދޫ ދޮންދުބުރިގޭ އުމުރުން 38 އަހަރުގެ މުހައްމަދު އާމިރުގެ މައްޗަށެވެ.
މައިން ބަފައިންނަށް ހުތުރުކޮސް ވާހަކަ ދައްކާ އަނިޔާކުރާނެކަމުގެ އިންޒާރު ދީފައިވާތީ މީނާގެ މައްޗަށް 2022 ވަނަ އަހަރު މެޖިސްޓްރޭޓް ކޯޓަކުންވެސް ވަނީ އަމުރު ނެރެފައެވެ. އެ އަމުރުގައިވަނީ އޭނާގެ މަންމަ އާއި ދޮންބައްޕައަށް ބަހުގެ ހަމަލާ ނުދިނުމަށާއި އިންޒާރުދީ ބިރު ނުދެއްކުމަށާއި ހަޑިހުތުރު ބަހުން ވާހަކަ ނުދެއްކުމަށް އަމުރުކޮށްފައެވެ. އަދި މަސްތުވާތަކެތި ބޭނުން ކުރުމަށް ފައިސާ ނުހޯދުމަށާއި ގޭގައި ހުންނަ މުދަލަށް ގެއްލުން ނުދިނުމަށްވެސް ވަނީ އަންގާފައެވެ. މީގެއިތުރުން މައިން ބަަފައިންނާއި ތަކެއްޗަށް ގެއްލުން ދީފާނެ ކަމުގެ ބިރުނުދެއްކުމަށް އެ އަމަުރުގައި މީނާގެ މައްޗަށް ވަނީ އަންގާފައެވެ.
އެހެންނަމަވެސް އެ އަމުރު ނެރުނުތާ ދެ މަސްފަހުން މި މީހާ ވަނީ ދްރަގު ގަންނަން އޭނާގެ މަންމަގެ އަތުން ފައިސާ ހޯދަން މަސައްކަތްކޮށް ފައިސާ ނުލިބުމުން ގޭގެ ބަދިގޭގައި ހުރި ތަކެއްޗަށް ގެއްލުން ދީފައެވެ.
މީނާގެ މައްޗަށް އުފުލީ މުދަލަށް ގެއްލުންދިނުމުގެ ކުށުގެ ދައުވާއާއި ރައްކާތެރިކުރުމުގެ އަމުރާ ހިލާފުވުމުގެ ކުށުގެ ދައުވާއެވެ.
މި މައްސަލާގައި މީނާގެ މައްޗަށް އިއްވި ހުކުމުގައި ވަނީ އަމުރާ ހިލާފުވުމުން އެކަމުގެ އަދަބެއްގެ ގޮތުން ހަ މަހަށް ޖަލަށްލުން ނުވަތަ 15،000 ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާކުރުމެވެ. އަނެއް ދައުވާއާ އެކު ކޯޓުން މީނާގެ މައްޗަށް ހުކުމްކޮށްފައިވަނީ 7 މަހާއި 6 ދުވަހުގެ ޖަލު ހުކުމެކެވެ.
