ޓީޖީއެސްޓީ، ގްރީން ޓެކްސް އަދި އެއާޕޯޓު ފީތައް ބޮޑުކުރުމަށް ރައްޔިތުންގެ މަޖިލީހުން ފާސްކުރީ މިދިޔަ މަހުގެ 31 ވަނަދުވަހުއެވެ. މި ބިލުތައް ފާސްކޮށްފައިވަނީ އެއްވެސް ބަދަލެއް ނުގެނެސް، 71 މެންބަރުންގެ ވޯޓުންނެވެ.
ރައީސް ޑރ. މުހައްމަދު މުއިއްޒު މިއަދު ވަނީ މި ބިލްތައް ތަސްދީގުކުރައްވާފައެވެ. މި ޤާނޫނުތަކަށް އަމަލުކުރަން ފެށުމަށް ހަމަޖެހިފައިވަނީ މި ޤާނޫނު ތަސްދީގުކޮށް، ދިވެހިސަރުކާރުގެ ގެޒެޓުގައި ޝާއިއުކުރާ ދުވަހުން ފެށިގެންނެވެ.
މި ބަދަލުތަކާ އެކު ޖޫން 2025 އިން ފެށިގެން ޓީޖީއެސްޓީ 16 ޕަސަންޓުން 17 ޕަސަންޓަށް ބޮޑުވާނެ އެވެ. އަދި ޖެނުއަރީ 2025 އިން ފެށިގެން ގްރީން ޓެކްސް ހަ ޑޮލަރުން 12 ޑޮލަރަށް އިތުރުވެގެންދާނެ އެވެ. މީގެ އިތުރުން، އެއާޕޯޓު ފީތަކަށް ވެސް ބޮޑެތި ބަދަލުތަކެއް ގެނެސްފައިވެ އެވެ.
އެއާޕޯޓު ފީތަކުގެ ތެރެއިން އިކޮނޮމީ ކްލާހުން ދަތުރުކުރާ ދިވެހިންގެ އަތުން ނަގާ ފީ އަދި ޓެކްސް ފިޔަވައި އެހެން ހުރިހާ ފީތަކެއް ބޮޑުކުރަން ވަނީ ނިންމައިފަ އެވެ. މިހާރު ވެސް އިކޮނޮމީ ކްލާހުން ދަތުރުކުރާ ދިވެހިންގެ އަތުން 12 ޑޮލަރުގެ ފީއަކާއި 12 ޑޮލަރުގެ ޓެކުހެއް ނަގަމުންދެ އެވެ.
މި ބަދަލުތަކާ އެކު ސަރުކާރަށް ލިބޭ އާމްދަނީ އިތުރުވާނެ ކަމަށް ލަފާކޮށްފައިވެ އެވެ. ގްރީން ޓެކްސްގެ ގޮތުގައި 963.6 މިލިއަން ރުފިޔާ އަދި 2026 ގައި 1.19 ބިލިއަން ރުފިޔާ ލިބޭނެ ކަމަށް ސަރުކާރުން ބުނެ އެވެ. އަދި ޓީޖީއެސްޓީ ބޮޑުކުރުމުން އަންނަ އަހަރު 201.9 މިލިއަން ރުފިޔާ އަދި 2026 ވަނަ އަހަރު 330.8 މިލިއަން ރުފިޔާ ލިބޭނެ ކަމަށް ލަފާކުރެ އެވެ.
