ސަރުކާރަށް އަހަރެއްވުމާއި ދިމާކޮށް އެއްއަހަރުގެ ތެރޭގައި ކުރެވުނު މަސައްކަތްތައް ހިއްސާކޮށް ކޮންސްޓްރަކްޝަން މިނިސްޓްރީގެ އެކްސްގައި ކުރި ޕޯސްޓެއްގައި ބުނީ މިއަހަރުގެ ތެރޭގައި އެއް ރަށުގެ ބިން ހިއްކާ 1 ރަށުގެ މަގު ހަދާ އަދި ތިން ރަށުގެ ގޮނޑުދޮށް ހިމާޔަތްކުރުމުގެ މަޝްރޫއު ނިންމާފައިވާކަަމަށެވެ.
މިގޮތުން މިނިސްޓްރީން ބުނީ ބިން ހިއްކާ ނިންމާ ނ. މާފަރުގެ ކަމަށެވެ. އެރަށުގެ ބިން ހިއްކުމުގެ މަސައްކަތް އެމްޓީސީސީއާ ހަވާލުކުރީ މިދިޔަ ސަރުކާރުންނެވެ. އެ މަސައްކަތް ހަވާލުކުރީ 23 އޮގަސްޓް 2023 ގައެވެ.
މަސައްކަތް ހަވާލުކުރި ދުވަހު ކޮންސްޓްރަކްޝަން މިނިސްޓްރީން ބުނީ މާފަރު ބިން ހިއްކުމުގެ މަޝްރޫޢުގެ ދަށުން 20.40 ހެކްޓަރު ހިއްކާނެކަަމަށެވެ. އަދި އެސަރަހައްދު ހިމާޔަތް ކުރުމަށް ރިވެޓްމަންޓް ޖެހުންވެސް މިމަސައްކަތުގެ ތެރޭގައި ހިމެނޭއިރު މަސައްކަތް ނިންމަން ހަވާލުކުރީ 300 ދުވަހުގެ ތެރޭގައެވެ. މި މޝްރޫއު އެމްޓީސީސީއާ ހަވާލުކުރީ 91.45 މިލިއަން ރުފިޔާއަށެވެ.
މާފަރު ބިން ހިއްކުމުގެ މަޝްރޫއުގެ އެއްބަސްވުމުގައި ސޮއިކުރުމުގެ ތެރެއިން
ކޮންސްޓްރަކްޝަން މިނިސްޓްރީން ބުނީ މިއަހަރުގެ ތެރޭގައި ނިންމި މަގު ހެދުމުގެ މަސައްކަތަކީ ގދ. ތިނަދޫ މަގު ހެދުމުގެ ދެވަނަ ފިޔަވަހީގެ މަސައްކަތް ކަމަށެވެ.
ތިނަދޫ މަގު ހެދުމުގެ ދެވަނަ ފިޔަވޙިގެ މަސައްކަތް ފެށީ 2022 ވަނަ އަހަރުގެ ފެބްރުއަރީ މަހުގެ 22 ވަނަދުވަހުއެވެ. މި މަޝްރޫއުގެ ދަށުން 6.5 ކިލޯ މީޓަރުގެ މަގު ތަރައްޤީ ކުރުމަށް ވަނީ ހަމަޖެހިފައިވާކަމަށް އާރުޑީސީން ބުނެފައިވެއެވެ.
ކޮންސްޓްރަކްޝަން މިނިސްޓްރީން ބުނީ ސަރުކާރުގެ މި އަހަރުގެ ތެރޭގައި ތިން ރަށެއްގެ ގޮނޑުދޮށް ހިމާޔަތްކުރުމުގެ މަޝްރޫއުވެސް ނިންމާފައިވާކަަމަށެވެ. އެ ރަށްތަތަކީ މާލެ އަތޮޅު ގުޅިފަޅާ، ރ. އިންނަމާދޫގެ އިތުރުން ތ. ވިލިފުށިކަމަށް ކޮންސްޓްރަކްޝަން މިނިސްޓްރީން ބުނެއެވެ.
