ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާން އަބޫބަކުރު މަޖިލީހަށް ހުށައެޅި މީޑިއާ ކޮމިޝަންގެ ބިލާއި މެދު ކަންބޮޑުވުން ފާޅުކޮށް މޯލްޑިވްސް މީޑިއާ ކައުންސިލާއި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) "ހަތަރެއްގެ ހައްގުގައި" ނަމުގައި ކެމްޕެއިނެއް ފަށައިފައެވެ.
މި ކެމްޕެއިން ދަށުން އެމްޖޭއޭގެ މެމްބަރުން މިއަދު ވަނީ ބަންޑާރަ ނައިބު އަހްމަދު އުޝާމާއި ބައްދަލުކޮށްފައެވެ. މި ބައްދަލވުމާއި ގުޅޭގޮތުން ބަންޑާރަ ނައިބު އޮފީހުން ބުނީ މަޖިލީހަށް ހުށަހެޅިފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ބިލާ ބިލާ ގުޅޭ ގޮތުން ނޫސްވެރިންގެ ހުރި ޝަކުވާތައް ބަންޑާރަ ނައިބު އަޑުއައްސަވާފައިވާކަމަށެވެ. އަދި ނޫސްވެރިންގެ ކަންބޮޑުވުންތަކަށް ހައްލު ހޯއްދަވައިދެއްވާނެ ކަމުގެ ޔަޤީންކަން ބަންޑާރަނައިބު އުޝާމް ދެއްވިކަމަށްވެސް އެ އޮފީހުން ބުނެއެވެ.
މިބައްދަލުވުމުގައި ބަންޑާރަނައިބުގެ އިތުރުން، ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު އިބްރާހީމް ވަހީދާއި، މިނިސްޓަރ އެޓް ދަ ޕްރެޒިޑެންޓްސް އޮފީސް ފޯ ސްޓްރެޓީޖިކް ކޮމިއުނިކޭޝަން އިބްރާހީމް ހަލީލްވެސް ބައިވެރިވެ ވަޑައިގެންނެވިއެވެ.
ބަންޑާރަ ނައިބު އުޝާމް އެމްޖޭއޭގެ މެމްބަރުންނާއި އެކު ބޭއްވި ބައްދަލުވުމުގެ ތެރެއިން
މީޑިއާ ރެގިއުލޭޓްކުރަން މިހާރު އޮންނަ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވާލާ އެއްކޮށްލަން 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު'ގައި ނޫސްވެރިން ބޮޑެތި އަދަދު ޖޫރިމަނާކުރުމާއި ލައިސަންސް ބާތިލުކުރަން ކޯޓަށް ދިއުމުގެ ބާރު އެ ކޮމިޝަނަށް ދީފައެވެ.
ކޮމިޝަން އެކުލެވިގެން ވަނީ 7 މެމްބަރުންގެ މައްޗަށެވެ. އޭގެތެރެއިން 4 މެމްބަރުންނަކީ ރައީސް އައްޔަންކުރައްވާ ހަތަރު މެމްބަރުންނެވެ. އަނެއް ތިން މެމްބަރުންނަކީ މީޑިއާތަކުން އިންތިހާބު ކުރާ ބައެކެވެ.
ސަރުކާރުގެ ހިންގާ ޕީއެންސީން ބުނީ މި ބިލް މަޖިލިހަށް ބަލައިގަތުމާއި މެދު ގޮތެއް ނިންމާނީ ބިލް ދިރާސާކުރުމަށްފަހުގައި ކަމަށެވެ.
