ބިލު ފާސްކުރީ 70 މެންބަރުންގެ ވޯޓާއެކު އެވެ. އެ ބިލު ފާސްކުރަން ނުފެންނަ ކަމަށް 11 މެންބަރުން ވޯޓު ދެއްވި އެވެ.
އާބަން ޑިވެލޮޕްމެންޓުގެ ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ ގއ. ވިލިނގިލި ދާއިރާގެ ޕީއެންސީ މެންބަރު އާޒިމް އަބްދުލްއަޒީޒެވެ.
އެ ބިލު ދިރާސާ ކުރީ ގައުމީ ތަރައްގީ އާއި ތަރިކައިގެ ކޮމިޓީ އާއި ލާމަރުކަޒީ ކޮމިޓީ ގުޅިގެން އުފެއްދި ޖޮއިންޓް ކޮމިޓީއަކުންނެވެ. ބިލް ދިރާސާކުރަން އެކުލަވާލާފައިވާ ހާއްސަ ކޮމިޓީގައި ބައެއް މެންބަރުން ވެސް ފާހަގަ ކުރެއްވީ އާބަން ޑިވެލޮޕްމަންޓް ބިލާ އެކު، ލާމަރުކަޒީ ނިޒާމުގައި ތަޅު އެޅުވޭނެ ކަމަށެވެ. ކައުންސިލްތަކަށް ފުޅާކޮށް ދީފައިވާ ބާރުތައް ގެއްލި، ލާމަރުކަޒީ ގާނޫނަކީ އެހެން ގާނޫނެއްގެ ބެލެނިވެރިކަމުގެ ދަށުން ހިންގާ އާދައިގެ ގާނޫނަކަށް ވާނެ ކަމުގެ ނުތަނަވަސްކަން މެންބަރުން ފާޅުކުރެއްވި އެވެ.
އާބަން ޑިވެލޮޕްމެންޓު ބިލަށް އެ ކޮމިޓީން ގެނެއީ ކުދިކުދި އަށް އިސްލާހެވެ. ފާހަގަކޮށްލެވޭ ބަދަލެއްގެ ގޮތުގައި އޮތީ ޖޫރިމަނާ ކުރާ މަޝްރޫއުއަކީ 20 މިލިއަނަށްވުރެ ބޮޑު މަޝްރޫއުއެއް ނަމަ އެ މަޝްރޫއުގެ އަގުގެ 5 ޕަސެންޓަށްވާ އަދަދު ޖޫރިމަނާ ކުރެވޭ ގޮތަށް ގެނެސްފައި އޮތް އިސްލާހެވެ. ބިލު ހުށަހެޅިއިރު، އޮތީ އެފަދަ މަޝްރޫއުއެއް ޖޫރިމަނާ ކުރެވޭނީ ޖުމުލަ އަގުގެ އެއް ޕަސެންޓުން ކަމަށެވެ.
މި ބިލުގެ މަގުސަދެއް ކަމުގައި ބަޔާންކޮށްފައިވަނީ ރާއްޖޭގެ އާބަން ސަރަހައްދުތައް ކަނޑައެޅުމާއެކު، އެފަދަ ސަރަހައްދުތައް ގިންތިކުރާނެ ގޮތާއި، އެ ސަރަހައްދުތަކުގެ ބިންތއް ބޭނުންކުރާނެ ގޮތުގެ އުސޫލުތައް ބަޔާންކުރުން ކަމަށެވެ. އަދި އާބަން ޑިވެލޮޕްމެންޓު މަޝްރޫއުތައް އެއް މިންގަނޑެއްގެ ތެރެއިން ކުރިއަށްގެންދެވޭކަން ކަށަވަރުކޮށް އެފަދަ ސަރަހައްދުތައް ތަރައްގީކުރުމުގެ އަސާސީ މިގަނޑުތައް ބަޔާންކުރުން ކަމަށެވެ.
އެ ބިލަކީ ލާމަރުކަޒީ ނިޒާމް ފުނޑާލާނެ ބިލެއް ކަމަށް އިދިކޮޅޫ އެމްޑީޕީން ވަނީ ބުނެފަ އެވެ.
