ކަޕޫރު ޢާއިލާގެ މެންބަރުން ބަޔަކު ވަނީ ބޮޑު ވަޒީރު ނަރެންދްރަ މޯދީއާ ބައްދަލުކޮށްފައެވެ. މި ބައްދަލުވުމުގައި ރަންބީރް ކަޕޫރް، އާލިއާ ބަޓް، ސައިފް އަލީ ހާން، ކަރީނާ ކަޕޫރް، ނީތު ކަޕޫރް އަދި ކަރިޝްމާ ކަޕޫރް ބައިވެރިވިއެވެ. މި ބައްދަލުވުމުގެ މަޤްޞަދަކީ ރާޖް ކަޕޫރުގެ ފިލްމް ފެސްޓިވަލްއަށް ބޮޑުވަޒީރަށް ދައުވަތު އެރުވުމެވެ.
އިންޑިއާގެ ސިނަމާގެ ލެޖެންޑް ރާޖް ކަޕޫރުގެ 100 އަހަރުގެ އުފަން ދުވަސް ފާހަގަކުރުމަށް ޕީވީއާރް އައިނޮކްސް އާއި ފިލްމް ހެރިޓޭޖް ފައުންޑޭޝަނުން ޚާއްސަ ފިލްމް ފެސްޓިވަލްއެއް ބޭއްވުމަށް ވަނީ ހަމަޖެހިފައެވެ.
ޑިސެމްބަރ 13 އިން 15 އަށް ބޭއްވުމަށް ހަމަޖެހިފައިވާ މި ފެސްޓިވަލްގައި ރާޖް ކަޕޫރުގެ މަޝްހޫރު ފިލްމުތައް ކަމުގައިވާ "އަވާރާ"، "ޝްރީ 420"، "ސަންގަމް" އަދި "މޭރާ ނާމް ޖޯކަރް" ފަދަ ފިލްމުތައް ދައްކާނެއެވެ.
މި ފެސްޓިވަލްގެ ހާއްސަކަން އިތުރުވެގެންދަނީ ކަޕޫރު ޢާއިލާގެ މިހާރުގެ ޖީލުގެ ތަރިން ކަމުގައިވާ ރަންބީރް ކަޕޫރް، އާލިއާ ބަޓް، ކަރީނާ ކަޕޫރް ހާން އަދި ކަރިޝްމާ ކަޕޫރް ފަދަ ތަރިން މި ފެސްޓިވަލްގައި ބައިވެރިވުމަށް ހަމަޖެހިފައިވާތީއެވެ.
މީގެ އިތުރުން 1988 ގައި އަވަހާރަވި ރާޖް ކަޕޫރަކީ ދާދާސާހެބް ފަލްކޭ އެވޯޑާއި ޕަދްމަ ބޫޝަން ފަދަ އިއްޒަތްތެރި އެވޯޑުތައް ލިބިފައިވާ، އިންޑިއަން ސިނަމާގެ އެންމެ ނުފޫޒުގަދަ ފަންނާނުންގެ ތެރެއިންނެވެ.
