ލެބްރޯން ޖޭމްސްގެ މި ފަހަރުގެ ރެކޯޑަކީ އުމުރުން އެންމެ 18 އަހަރުގައި އެންބީއޭގައި ކުޅެން ފަށައި މެދު ނުކެނޑި އުމުރުން 40 އަހަރުވީ ފުރަތަމަ ކުޅުންތެރިޔާއަށް ވުމެވެ. ލެބްރޯން ޖޭމްސްއަށް 40 އަހަރު ފުރުނީ ޑިސެމްބަރު މަހުގެ 30 ވަނަ ދުވަހުއެވެ.
ލޮސް އެންޖަލިސް ލޭކާސްއާ ކްލެވެލަންޑް ކެވިލިއާސް އެންބީއޭގައި ކުޅުނު މެޗުގައި ލެބްރޯން ޖޭމްސް 23 ޕޮއިންޓް ހޯދިއިރު އެ މެޗަކީ 40 އަހަރު ފުރުން ފަހުން އޭނާ ކުޅުނު ފުރަތަމަ ރަސްމީ މެޗެވެ.
އުމުރުން 18 އަހަރުގައި 2003 ވަނަ އަހަރު އެންބީއޭގައި ފުރަތަމަ ފަހަރަށް ކުޅުނު ލެބްރޯން ޖޭމްސްއަކީ އެންބީއޭގެ އޯލްޓައިމް ޓޮޕް ސްކޯރާއެވެ.
އެންބީއޭގެ ހަތަރު ޗެމްޕިއަންކަން ހޯދައި، ހަތަރު ފަހަރު އެންމެ އަގުހުރި ކުޅުންތެރިޔާގެ މަގާމު ހޯދާފައިވާއިރު، އެންބީއޭގައި 22 ވަނަ ސީޒަނުގައި ކުޅެމުން އަންނަ ކުޅުންތެރިޔާވަނީ އޭނާ ކުޅުން ހުއްޓާލަންވީ ވަގުތު ކައިރިވަމުން އަންނަ ކަމަށް މި ފަހުން ބުނެފައެވެ.
މިދިޔަ ނޮވެންބަރު މަހު، ޖެހިޖެހިގެން ތިން ޓްރިޕަލް ޑަބަލް ހެދި އެންމެ ދުވަސްވީ ކުޅުންތެރިޔާގެ ރެކޯޑް ހެދި އެންބީއޭގެ ސުޕަސްޓާ ވަނީ އޭނާ ރިޓަޔާ ކުރަން ތައްޔާރުވަމުން އަންނަކަމުގެ އިޝާރާތެއް އޭރު ކޮށްފައެވެ.
