ހުވަދު އަތޮޅަށް ކުރައްވާ ދަތުރުފުޅުގައި ގދ. ފިޔޯރީ ރައްޔިތުންނާއެކު ރޭ ބޭއްވި ބައްދަލުވުމުގައި ވާހަަކަފުޅުދައްކަވަމުން ރައީސް ވިދާޅުވީ ކަރަންޓުގެ މައްސަލައަކީ ހުރިހާ ރަށެއްގައި ވެސް ވަރަށް ބޮޑުވެފައި އޮތް މައްސަލައެއް ކަމަށާއި އެގޮތުން ރޯދަ މަސް އަންނަންވާ އިރަށް، ހުރިހާ ރަށެއްގެ ކަރަންޓުގެ މައްސަލަ ހައްލުކުރަން ޖަނެރޭޓަރުތައް ގެނެސްދީ އިންސްޓޯލްކޮށް ނިންމުމަށް މަސައްކަތް ފަށާފައިވާ ކަމަށެވެ.
މި މަސައްކަތް ކުރަނީ ފިނޭންސް މިނިސްޓްރީ އާއި ސަރުކާރުގެ ބައެއް ކުންފުނިތައް ގުޅިގެން ކަމަށާއި މިއީ ވަރަށް ބޮޑު ޗެލެންޖަކަށް ވާނެ މަސައްކަތެއް ކަމަށް ރައީސް ވިދާޅުވި އެވެ.
އެ މަނިކުފާނު ވިދާޅުވީ، ކަރަންޓުގެ މައްސަލަ ހައްލުކުރަން ބޮޑު ގޮންޖެހުމެއް ކުރިމަތިވާނެ ކަމަށެވެ. ނަމަވެސް ކަރަންޓުގެ މައްސަލައަށް ޖުމްލަ ހައްލެއް ގެނައުމަކީ އެމަނިކުފާނުގެ އަމާޒެއް ކަމަށެވެ.
ރާއްޖޭގެ ރަށްތަކަށް ދިމާވެފައިވާ ކަރަންޓުގެ މައްސަލަ ރޯދައިގެ ކުރިން ހައްލު ކޮށްދެއްވާނެ ކަމުގެ ޔަގީންކަން ރައީސް މުއިއްޒު ދެއްވާފައިވާއިރު، މާލޭގެ އިތުރުން ރަށްރަށުގައި ކަރަންޓު ބިލު ބޮޑުވާ މައްސަލައަކީ ފަހަކަށް އައިސް ރައްޔިތުން ވަރަށް ބޮޑަށް ކުރަމުން އަންނަ ޝަކުވާއެކެވެ.
