
އަދުލުގެ ނިޒާމު ހަރުދަނާ ކުރުމަށްޓަކައި އިނގިރޭސި ސަރުކާރާއި ދިވެހި ސަރުކާރުން ގުޅިގެން "އަންލޮކިން ޖަސްޓިސް" ގެ ނަމުގައި މަޝްވަރާ ބައްދަލުވުމެއް ބާއްވައިފިއެވެ.
ކުރުނބާ ރިސޯޓުގައި ބޭއްވުނު މި ބައްދަލުވުމުގައި އުއްތަމަ ފަނޑިޔާރު މުއުތަސިމް އަދުނާނާއި، ބަންޑާރަ ނައިބު އަހުމަދު އުޝާމްގެ އިތުރުން ޕްރޮސެކިއުޓަރ ޖެނެރަލް އައްބާސް ޝަރީފް ބައިވެރިވެ ވަޑައިގެންނެވިއެވެ. މި ބައްދަލުވުމަކީ ޖިނާއީ އަދުލުގެ ނިޒާމު ހަރުދަނާ ކުރުމަށް ކުރެވުނު ދިރާސާއެއްގެ ހޯދުންތައް ހިއްސާކުރުމަށް ބޭއްވުނު ބައްދަލުވުމެކެވެ.
ބައްދަލުވުމުގައި ވާހަކަދައްކަވަމުން ބަންޑާރަ ނައިބު އުޝާމް ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން އަދުލު އިންސާފު ހަމަހަމަކަމާއެކު ގާއިމްކުރުމަށް އިސްކަންދޭ ކަމަށެވެ. އަދި ޝަރީއަތުގެ އަޑުއެހުންތައް ލަސްވަމުންދާ މައްސަލައަށް ހައްލު ހޯދުމަށް ގާނޫނީ ބަދަލުތަކެއް ގެނައުމަށް މަސައްކަތްކުރަމުންދާ ކަމަށް އޭނާ ބުންޏެވެ.
އިނގިރޭސި ސަފީރު ނިކް ލޯ ވިދާޅުވީ ދިވެހި ސަރުކާރުން އަދުލުގެ ނިޒާމު ހަރުދަނާކުރުމަށް ކުރަމުންދާ މަސައްކަތްތަކަކީ މުހިންމު މަސައްކަތްތަކެއް ކަމަށެވެ. އަދި ރައީސް މުއިއްޒުގެ ރިޔާސީ ބަޔާނުގައި އިއުލާންކުރެއްވި ބަދަލުތަކަށް މަރުހަބާ ކިޔާ ކަމަށްވެސް އޭނާ ވިދާޅުވިއެވެ.
ބައްދަލުވުމުގައި އަދުލުގެ ނިޒާމު ޑިޖިޓަލައިޒް ކުރުމާއި އިދާރާތައް ގުޅިގެން މަސައްކަތްކުރުމުގެ މުހިންމުކަމާ ގުޅޭގޮތުން މަޝްވަރާކުރެވުނެވެ.