ށ. އަތޮޅު ކައުންސިލްގެ މުވައްޒަފުން އައްޑޫ މީދޫގެ ޑްރެގަން ފުރުޓް ފާމަކާއި ކިއުކަމްބާ ފާމަކަށް ކުރި ދަތުރަކާ ގުޅިގެން މިނިސްޓަރު މާރިޔާ ވިދާޅުވީ، ރަށްރަށުގެ މެދުގައި ތަޖުރިބާ ބަދަލުކޮށް، އެއްބައިވަންތަކަމާއެކު މަސައްކަތްކުރުމަކީ ދިވެހި ދަނޑުވެރިކަން ކުރިއެރުވުމަށް ކޮންމެހެން މުހިންމު ކަމެއް ކަމަށެވެ.
މިނިސްޓަރު ވިދާޅުވި ގޮތުގައި ޑްރެގަން ފުރުޓް އަދި ކިއުކަމްބާ ފަދަ ތަފާތު ބާވަތްތަކުގެ ދަނޑުވެރިކަން ކުރިއަރުވައި، އޭގެ މައުލޫމާތު އެހެން މީހުންނާ ހިއްސާކުރުމަކީ ރާއްޖޭގެ ދަނޑުވެރިކަން ތަރައްގީ ކުރުމަށް އެޅޭ މުހިންމު ފިޔަވަޅެކެވެ. އަދި މިފަދަ ދަތުރުތަކުން ލިބޭ މައުލޫމާތާއި ތަޖުރިބާ ބޭނުންކޮށްގެން އިތުރު ރަށްރަށުގައިވެސް ދަނޑުވެރިކަން ކުރިއަރައިގެންދާނެ ކަމަށް އެމަނިކުފާނު ވިދާޅުވިއެވެ.
ކައުންސިލްތަކުން މިފަދަ ގުޅުން ބަދަހިކޮށް، އެއްބައިވަންތަކަމާއެކު މަސައްކަތް ކުރުމަށް ނަންގަވާފައިވާ ފިޔަވަޅަށް މިނިސްޓަރު ޝުކުރު އަދާކުރައްވައި، ކުރިއަށް އޮތް ތަނުގައިވެސް މިފަދަ ގިނަ މަސައްކަތްތަކެއް ކުރެވި، ރާއްޖޭގެ ދަނޑުވެރިކަން އިތުރަށް ކުރިއަރައިގެންދާނެ ކަމުގެ އުންމީދު ފާޅުކުރެއްވިއެވެ.
