މިދިޔަ އަހަރުގެ ސެޕްޓެމްބަރު މަހު ޒަހަމްތަކަކާއެކު މަރުވެފައި އޮއްވާ ފެނުނު ޒަކިއްޔާގެ މައްސަލައިގައި އެކަށީގެންވާ ތަހުގީގެއް ނުކުރާ ކަމަށް ބުނެ ރައްޔިތުން ދަނީ މުޒާހަރާކުރަމުންނެވެ. މި މުޒާހަރާތަކަށް ހަފްތާއެއްވާން ކައިރިވެފައިވާއިރު، އެ ދާއިރާގެ މަޖިލިސް މެންބަރު އަބްދުލް ސައްތާރު މުހައްމަދު މިއަދު ވަނީ ދެ އިސް ވެރިން ރަށަށް ވަޑައިގަންނަވާނެ ކަމުގެ މައުލޫމާތު ހާމަކުރައްވާފައެވެ.
ރައްޔިތުން ތުހުމަތުކުރާ ގޮތުގައި މި މަރުގެ ފަހަތުގައި ޒަކިއްޔާގެ ފިރިމީހާ އެބަހުއްޓެވެ. ފުލުހުން ބުނެފައިވާ ގޮތުގައި ޒަކިއްޔާ މަރުވެފައި ފެނުނީ ކަރަށް ލިބުނު ފަސް ޒަހަމަކާ ގުޅިގެންނެވެ. ނަމަވެސް މިހާތަނަށް އެއްވެސް މީހަކު ހައްޔަރުކުރެވިފައެއް ނުވެއެވެ.
މި މައްސަލައިގެ ސީރިއަސްކަން ބޮޑުކަމުން އެންއައިސީން ވަނީ މައްސަލަ ބަލަން ފަށައިފައެވެ. އަދި ތަހުގީގަށް އިތުރު ބާރެއް ލިބޭނެ ގޮތަށް އެފްބީއައިގެ އެހީތެރިކަން ހޯދުމަށް ވެސް ފުލުހުން ވަނީ ނިންމައިފައެވެ.
