އޭނާ މިހެން ވިދާޅުވެފައިވަނީ ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް މަޖިލީހުން ބިލެއް ފާސްކޮށް، އަދި ތިން ފަނޑިޔާރަކު ސަސްޕެންޑްކުރަން ޖޭއެސްސީން ނިންމުމާ ގުޅިގެންނެވެ. ސޯޝަލް މީޑިއާގައި ކުރެއްވި ޕޯސްޓެއްގައި ޝިފާޒު ވިދާޅުވީ ގާނޫނުއަސާސީ އެކުލަވާލާފައި އޮތީ އެއްބާރު އަނެއްބާރާ މުޑިއަރާ ގޮތަކަށް ނޫން ކަމަށެވެ.
މަޖިލީހުން މިއަދު ފާސްކުރި ބިލުގެ ދަށުން ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރަން ވަނީ ނިންމާފައެވެ. އަދި މި ބިލު ފާސްކުރިތާ މަދު ވަގުތުކޮޅެއްގެ ތެރޭގައި ޖޭއެސްސީން ވަނީ ތިން ފަނޑިޔާރަކު ސަސްޕެންޑްކޮށްފައެވެ.
ޖޭއެސްސީން ބުނީ ފަނޑިޔާރުން ސަސްޕެންޑްކޮށްފައިވަނީ އޭސީސީން އެ ފަނޑިޔާރުންނާ ދެކޮޅަށް ޖިނާއީ ތަހުގީގެއް ހިންގަމުންދާ ކަމުގެ މައުލޫމާތު ލިބުމާ ގުޅިގެން ކަމަށެވެ. ނަމަވެސް މި ބިލަކީ ގާނޫނުއަސާސީއާ ހިލާފު އަދި ކޯޓުތަކަށް ނުފޫޒު ފޯރުވުމަށް އަމާޒުކޮށްގެން ހަދާފައިވާ ބިލެއް ކަމަށް ގިނަ މާހިރުން ދަނީ ފާހަގަކުރަމުންނެވެ.
