ads
ކުޅުދުއްފުށި
ބޮޑު ކަތިވަޅިއެއް ހިފައިގެން ފިހާރަކަށް ވަތް މީހަކު ޖަލަށް
ތިލައިގެ ދިގުމިނުގައި ގާތްގަނޑަކަށް ފޫޓެއް ހުންނަ ވަރުގެ ކަތިވަޅިއެއް ހިފައިގެން، ހދ. ކުޅުދުއްފުށީ ފިހާރައަކަށް ވަތް މީހެއްގެ މައްޗަށް އަހަރު ދުވަހުގެ ޖަލު ހުކުމެއް އިއްވައިފި އެވެ.
Advertisement

މިއއީ ހދ. ކުޅުދުއްފުށީ، ކަނޑޫމާގެ އިބްރާހީމް ހަސަންގެ މައްޗަށް ޕްރޮސެކިއުޓަރ ޖެނެރަލް ދައުވާ ކުރި މައްސަލައެކެވެ. މި މައްސަލައިގައި ދައުލަތުން ދައުވާ ކުރީ، މަޤްބޫލު ސަބަބެއްނެތި އާންމު ތަނެއްގައި ތޫނު އެއްޗެއް ގެންގުޅުމުގެ ކުށެގެ ދައުވާ އެވެ.

ފެބްރުއަރީ މަހު ހުކުމް ކުރި މި މައްސަލައަކީ، މިދިޔަ އަހަރުގެ ސެޕްޓެމްބަރު މަހު 19 ވަނަ ދުވަހު، ހެނދުނު 07:12 އެހައިކަށްހައިއިރު އިބްރާހީމް ހަސަން، ހދ. ކުޅުދުއްފުށި "ފެހިދޫލަ 1 ފިހާރައަށް ވަދެ އެ ތަނުގައި ތިލަގަނޑުގައި ފޫޓެއް ހުރި ކަތިވަޅިއެއް ގެންގުޅުނު މައްސަލައެވެ.

މި މައްސަލައިގައި ދައުލަތުން، ޝަރީއަތުގައި ދައުވާ ކިޔައިދިނުމަށް ފަހު، ދައުވާއަށް ޖަވާބުދާރީވުމަށް ދެވުނު ފުރުސަތުގައި ދައުލަތުގެ ދައުވާ ސާފުވެއްޖެ ކަމަށާއި ދައުވާއަށް ޖަވާބުދާރީވާން ބޭނުންވަނީ ވަކީލަކާ ނުލައި އަމިއްލައަށް ކަމަށް ބުނެ އިބްރާހީމް ހަސަންވަނީ ދައުވާއަށް އިންކާރުކޮށްފަ އެވެ.

އިބްރާހީމް ޙަސަން ދައުވާއަށް އިންކާރުކުރުމުން ދައުލަތުން މި މައްސަލަ ސާބިތުކުރުމަށް ހުރި ހެކި ހާމަކޮށްފައިވެއެވެ. އެގޮތުން ޝަފަހީ ތިން ހެއްކަކާއި ކިތާބީ ހެކީގެ ގޮތުގައި ފަސް ހެއްކެއް ދައުލަތުން ހުށަހަޅާފައިވެއެވެ. ދައުލަތުން ހެކި ހާމަކުރުމުން ދިފާއުގައި ހުރި ހެކި ހާމަކުރުމަށް އިބްރާހީމް ޙަސަން އަށް ފުރުސަތު ދިނުމުން، އެއްވެސް ހެއްކެއް ހުށަހަޅާފައެއް ނުވެ އެވެ.

ދައުލަތުން ހުށަހެޅި ހެކީގެ އަލީގައި މައްސަލަ ސާބިތުވާކަމަށް ޝަރީއަތުން ކަނޑައަޅައި، އަދަބާ މެދު ވާހަކަ ދައްކަން ދިން ފުރުސަތުގައިވެސް އިބްރާހީމް ހަސަން އެއްވެސް ވާހަކައެއް ދައްކާފައި ނުވާކަން މައްސަލަ ނިމުނު ގޮތުގެ ރިޕޯޓުން އެނގެ އެވެ. 

އެކަމަކު، އޭނާގެ ކުށުގެ ރެކޯޑު އޮތުމާއެކު، ކުށުގެ ބާވަތަށް ބަލައި މި ކުށަށް ދެވޭނެ އެންމެ ބޮޑު އަދަބެއް ކަނޑައަޅައި ދިނުމަށް ދައުލަތުން އެދިފައިވެ އެވެ. މި މައްސަލައިގައި ހދ. ކުޅުދުއްފުށީ ކޯޓުން އިއްވި ހުކުމަކީ، 12 މަސް ދުވަހުގެ ޖަލު ހުކުމެވެ

50%
ކަމުގޮސްފި
0%
އަޑުއެހިތާ މިހުރީ
50%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް