މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް މިދިޔަ އަހަރު ގެނައި އިސްލާހު ބާތިލްކުރަން ރައްޔިތުން މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ވަނީ ސުޕްރީމް ކޯޓަށް ހުށައަޅާފައެވެ. އެ މައްސަކައި ތެރެއިން އޭނާ ވަނީ އެ އިސްލާހު މިހާރު މި ހިނގާ 20 ވަނަ ރައްޔިތުން މަޖިލީހުގެ މެމްބަރުންނަށް ނުހިގާނެކަމަށް ކަނޑައަޅާދިނުމަށް އެދިފައެވެ.
މި މައްސަލާގެ ރައްދު ދައުލަތުގެ ބަނޑާރަ ނައިބުގެ ފަރާތުން މިހާރު ވަނީ ސުޕްރީމްކޯޓަށް ފޮނުވާފައެވެ. ދައުލަތުން ބަނޑާރަ ނައިބު އަހްމަދު އުޝާމް ސޮއިކޮށް މިއަދު ފޮނުވި ރައްދުގައި ވަނީ ތިން ކަމެއް ކަނޑައަޅާދިނުމަށް ސުޕްރީމު ކޯޓުގައި އެދިވަޑާއިގެންފައެވެ. އެގޮތުން ގާނޫނުއަސާސީގެ މާއްދާއެއް ބާތިލް ކުރުމުގެ މި މައްސަލައަކީ ސުޕްރީމް ކޯޓަށް ބެލުމުގެ އިހްތިސާސް ލިބިގެން ނުވާ މައްސަލައެއް ގޮތުގައި ކަނޑައަޅާ ދިނުމަށް ވަނީ އެދިފައެވެ.
މީގެއިތުރުން ގާނޫނު އަސާސީއަށް ގެނައި އިސްލާހުތަކަކީ ސައްހަ އިސްލާހުތަކެއް ކަމަށް ކަނޑައަޅާދިނުމަށްވެސް ދައުލަތުގެ ބަންދާރަ ނައިބު ވަނީ އެދިވަޑައިގެންފައެވެ. ހަމަ އެއާއި އެކު ގޮނޑު ގެއްލޭގޮތަށްް ގާނޫނު އަސާސީއަށް ގެނައި އިސްލާހު މިހާރު ހިނގަމުން އަންނަ 20 ވަނަ ރައްޔިތުން މަޖިލީހުގެ މްމެބަރުންގެ މައްޗަށް ހިންގާނެކަމަށް ކަނޑައަޅާދިނުމަށްވެސް ވަނީ އެދިފައެވެ.
އަލީ ހުސެއިން ހުށައެޅި މައްސަލަ ކޯޓުގައި ހިނގަމުންދަނިކޮށް ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ތިރިކުރުމަށް ކޯޓްތަކުގެ ގާނޫނަށް އިސްލާހު ހުށައަޅާ އަވަސް އަރުވާލައިގެން ރައްޔިތުން މަޖިލީހުން ވަނީ ފާސްކޮށްފައެވެ. އެހެންނަމަވެސް މިހާތަނަށްވެސް ރައީސް މުއިއްޒު މި ގާނޫނު ތަސްދީގު ކުރައްވާފައެއް ނުވެއެވެ.
މަޖިލީހުން ސުޕްރީމްކޯޓުގެ ބެންޗުކުޑަކުރަން ފާސްކުރިތާ ކުޑައިރުކޮޅެެއްގެ ތެރޭގައި ޖޭއެސްސީން ކުއްލި ބައްދަލުވުމެއް ބާއްވާ ސުޕްރީމް ކޯޓުގެ ތިން ފަނޑިޔާރުން ވަނީ ކުއްލިގޮތަކަށް ސަސްޕެންޑްކޮށްފައެވެ.
ފަނޑިޔާރު ހުސްނުއްސުއޫދާއި ޑރ. އަޒްމިރަލްދާ ޒާހިރު އަދި މަހާޒު އަލީ ޒާހިރު ސަސްޕެންޑްކުރީ އެންޓި ކޮރަޕްޝަން ކޮމިޝަނުން ބަލަމުންދާ މައްސަލައަކާއި ގުޅިގެންކަމަށް ޖޭއެސްސީން ވަނީ ބުނެފައެވެ. ފަނޑިޔާރުން ސަސްޕެންޑް ކުރީ ކޯޓުގައި އޮތް މައްސަލައިގެ އަޑުއެހުމެއް އެދުވަހު ބާއްވަން ތާވަލުކޮށްފައި ވަނިކޮށެވެ.
