މި މަޝްވަރާތައް ކުރިއަށް ގެންގޮސްފައިވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ޓްރާންސްޕޯޓް މިނިސްޓްރީއާ ދެމެދުގައެވެ.
އާދިއްތަ ދުވަހު ބޭއްވުނު ބައްދަލުވުމުގައި، ޓެކްސީ ކިއުތަކަށް ގެންނަން ހަމަޖެހިފައިވާ ބަދަލުތަކުގެ އިތުރުން، ހަތަރު ފުރޮޅުލީ އެހެނިހެން އުޅަނދުތައް ދަތުރުކުރާނެ މަގުތަކަށް ގެންނަން ހަމަޖެހިފައިވާ ބަދަލުތަކާ ބެހޭގޮތުންވެސް ވަނީ މަޝްވަރާކޮށްފައެވެ. އަދި ވެހިކަލްތައް ޕާކުކުރުމަށް ކަނޑައަޅާފައިވާ ސަރަހައްދުތަކާއި، އެއާޕޯޓް ސަރަހައްދުގައި ބަހައްޓާ "ރައުންޑް އެބައުޓް" ތަކުގެ ބޭނުން ހިފާނެ ގޮތްތަކާ ބެހޭގޮތުންވެސް މަޝްވަރާކޮށްފައިވެއެވެ.
ވީއައިއޭގެ ޖުމްލަ ހިދުމަތްތައް އިތުރަށް ފުޅާވެ ރާއްޖޭގެ ޓޫރިޒަމް ދާއިރާއަށްވެސް އިތުރު ކުރިއެރުންތަކެއް ލިބިގެންދާނެ ކަމަށް މިނިސްޓްރީން ހާމަކޮށްފައިވެއެވެ.
ވެލާނާ އިންޓަނޭޝަނަލް އެއާޕޯޓްގެ އާ ޓާމިނަލް ހުޅުވުމަށް ހަމަޖެހިފައިވަނީ މި އަހަރުގެ އޮކްޓޯބަރމަހުގެ ކުރިން ކަމަށް ސަރުކާރުން ވަނީ އިއުލާންކޮށްފައެވެ. އެއާޕޯޓްގެ އާ ޓާމިނަލް ހުޅުވުމުން ޓެކްސީ ކިއުތަކަށް ގެންނަން ނިންމާ ބަދަލުތަކާބެހޭ އިތުރު މައުލޫމާތު ކުރިއަށް އޮތް ދުވަސްތަކުގައި ހާމަކުރާނެކަމަށް ބެލެވެއެވެ.
