މި މަޝްވަރާތައް ކުރިއަށް ގެންދިޔައީ ވަރޗުއަލްކޮށް ބޭއްވުނު ބައްދަލުވުމެއްގައެވެ.
މި ބައްދަލުވުމުގައި އެގްރިކަލްޗަރ މިނިސްޓަރު ޑރ. މަރިޔަމް މާރިޔާއާއި، ރާއްޖެއިން ތުރުކީއަށް ކަނޑައަޅުއްވާފައި ހުންނަވާ ސަފީރު އަބްދުލް ރަހީމް އަބްދުލް ލަތީފް ބައިވެރިވެވަޑައިގެންނެވިއެވެ. އަދި އަންކަރާ ޔުނިވަރސިޓީގެ ފަރާތުން އެ ޔުނިވަރސިޓީގެ ރެކްޓަރ ނެކްޑެޓް އުނުވަރ ބައިވެރިވެވަޑައިގެންނެވިއެވެ.
އެގްރިކަލްޗާ މިނިސްޓްރީން ބުނެފައިވާ ގޮތުގައި މި ބައްދަލުވުމުގައި ދިރާސާތައް ކުރުމާއި، އީޖާދީގޮތްތަކާއި އަދި ތަމްރީންތައް ފޯރުކޮށްދީގެން ރާއްޖޭގައި ކާނާގެ ޔަގީންކަން ކަށަވަރުކުރެވޭނެ ގޮތްތަކާއި ގުޅޭގޮތުން މަޝްވަރާކުރެވުނެވެ. އަދި ދަނޑުވެރިކަމުގެ ދާއިރާގައި ރާއްޖެއިން މަސައްކަތްކުރެވިދާނެ ގޮތްތަކާއި ގުޅޭގޮތުންވެސް މަޝްވަރާކުރެވުނެވެ.
އަންކާރާ ޔުނިވަރސިޓީއަކީ ޖަނަވާރުންނަށް ހާއްސަ ސިއްހީ ހިދުމަތްތައް ފޯރުކޮށްދިނުމުގައި ފާހަގަކޮށްލެވޭ ކާމިޔާބީތަކެއް ހޯދާފައިވާ ޔުނިވަރސިޓީއެކެވެ. އެ ޔުނިވަރސިޓީގައި ޖަނަވާރުތަކަށް ފަރުވާދޭ ހާއްސަ ވެޓެރިނަރީ ފެސިލިޓީ އެންމެ ފުރަތަމަ ގާއިމުކުރެވުނީ 1842 ވަނަ އަހަރުގައެވެ. މި ބައްދަލުވުމުގައި އެގްރިކަލްޗަރ މިނިސްޓަރު ޑރ. މާރިޔާވަނީ ޖަނަވާރުންނަށް ފޯރުކޮށްދޭ ހިދުމަތްތަކަށްވެސް އެ ޔުނިވަރސިޓީގެ އެހީތެރިކަން ހޯދުމަށް މަޝްވަރާކުރައްވާފައެވެ.
ރާއްޖޭގައި ކާނާގެ ޔަގީންކަން ކަށަވަރުކުރުމަށް ކުރެވޭ މަސައްކަތްތަކުގައި އަންކާރާ ޔުނިވަރސިޓީގެ ތަޖުރިބާއާއި ހުނަރު ބޭނުންކުރުމަށް ދެ ފަރާތުން އެއްބަސްވެފައިވާކަމަށް އެގްރިކަލްޗާ މިނިސްޓްރީން ބުނެފައިވެއެވެ.
