Advertisement

އިންޑިއާ ނޭވީގެ ހަނގުރާމަތީ މަނަވަރު "އައިއެންއެސް ކޮޗި" މާލެއަށް އައިސް ހުރަވީ ރާއްޖެއާ ހަވާލުކުރުމުގެ ރަސްމިއްޔާތު ކުރިއަށް ގެންގޮސްފައިވާކަމަށް އިންޑިއާއިން ބުނެއެވެ. 

މުންބާއީގައި މަރާމާތުކުރެވުނު ސީޖީއެސް ހުރަވީ ރާއްޖެއަށް ގެނައުމާއެކު، އިންޑިއާގެ ހައިކޮމިޝަނަރު ޖީ ބާލަސުބްރަމަނިއަން އެމްއެންޑީއެފްގެ ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީއަށް ރަސްމީކޮށް ހަވާލުކޮށްފިވެއެވެ. މި ރަސްމިއްޔާތު ބޭއްވުނީ އެމްއެންޑީއެފް ކޯސްޓް ގާޑް ޖެޓީގައެވެ. 

އިންޑިއާގެ މަނަވަރު "އައިއެންއެސް ކޮޗީގެ މި ޒިޔާރަތުގައި އެ އުޅަނދުގެ ކެޕްޓަން މަހޭޝް ސީ މައުދްގިލް، އެމްއެންޑީއެފްގެ ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީއާއި ކޯސްޓް ގާޑްގެ ކޮމާންޑަންޓް ބްރިގޭޑިއާ ޖެނެރަލް މުހައްމަދު ސަލީމްއާ ބައްދަލުކުރިއެވެ. މީގެ އިތުރުން ދެފަރާތުގެ ދެމެދު ބައްދަލުވުންތަކާއި ކުޅިވަރު މުބާރާތްތައް ބޭއްވުމަށް ވަނީ ހަމަޖެހިފައެވެ. ނޭވީ ޕީއާރުއޯ ކޮޗީން ބުނީ ރާއްޖެއާއި އިންޑިއާ ދެމެދު އޮތް ވަރުގަދަ ކަނޑުމަތީ ގުޅުން ހަރުދަނާކުރުމަށް މި ޒިޔާރަތުން މަގުފަހިވެގެންދާނެ ކަމަށެވެ.

މި އުޅަނދަކީ މެއި، 2023ގައި އިންޑިއާއާއި ރާއްޖޭގެ ރަހުމަތްތެރިކަމުގެ ނިޝާނެއްގެ ގޮތުން ހަދިޔާކޮށްފައިވާ އުޅަނދެކެވެ. މިދިޔަ ނޮވެންބަރު މަހު އެ އުޅަނދު މަރާމާތު ކުރަން ޖެހުނެވެ. ނަމަވެސް، އޭރު ރާއްޖޭގެ މާލީ ހާލަތު ހުރި ގޮތުން އިންޑިއާއިން ހިލޭ އެ މަސައްކަތް ކޮށްދިނުމަށް ނިންމިއެވެ.

މަރާމާތަށް ފަހު ގެނެވުނު ބަދަލުތައް: 

• ހުރިހާ މެޝިނަރީއެއް މަރާމާތުކުރެވުނު

• ހަތިޔާރުތަކާއި ސެންސަރުތައް މަރާމާތުކުރެވުނު

• ދިރިއުޅުމަށް ބޭނުންވާ ވަސީލަތްތައް އަޕްގްރޭޑްކުރެވުނު

• އުޅަނދުގެ ހާބަރު އަދި ކަނޑުމަތީ ޓެސްޓުތައް ކުރެވުނު

• އޮޕަރޭޝަނަލް ޗެކްތައް ކުރެވުނު

• ސަލާމަތީ އޮޑިޓްތައް ކުރެވުނު

• އުޅަނދު ދުއްވުމުގެ ތަމްރީނުތައް ކުރެވުނު

• އުޅަނދަށް ބޭނުންވާ ހަތިޔާރާއި ސްޕެއާ ޕާޓްސް ހަދިޔާކުރެވުނު

• އެމްއެންޑީއެފަށް ބޭނުންވާ މިއުޒިކަލް އިންސްޓްރުމަންޓްސް ހަދިޔާކުރެވުނު

• ގިނަ އަދަދެއްގެ ހަތިޔާރާއި ވަޒަން ހަދިޔާކުރެވުނު