ޝާހިދު މިހެން ވިދާޅުވީ މިއަދު ރައްޔިތުންގެ މަޖިލީހުގައި މަދަނީ ވައިގެ ދަތުރުފަތުރާ ބެހޭ ބިލުގެ ބަހުސްގައި ވާހަކަފުޅު ދައްކަވަމުންނެވެ.
ޝާހިދު ވިދާޅުވިގޮތުގައި ހުޅުދޫ އާއި މީދޫއަކީ އައްޑޫގައި އެއްފަސްކޮށް އޮންނަ ރަށްތަކާ ވަކިން އަދި ކަނޑެއް ހުރަސްކޮށްގެން ނޫނީ ނުދެވޭނެ ދެ ރަށް ކަމަށްވާތީ، ހުޅުމީދޫގެ ރައްޔިތުންނަށް ވަކިން ހާއްސަ އެއާޕޯޓެއް ބޭނުންވާ ކަމަށެވެ. އޭނާ ވިދާޅުވީ ކަނޑުގަދަ ދުވަސްވަރު ދަތުރުކުރުމުގައި ދިމާވާ އުނދަގޫތަކުގެ ސަބަބުން މިކަން މުހިންމުވާ ކަމަށެވެ. ޝާހިދު ވިދާޅުވިގޮތުން ދުވާލަކު 300-400 ރައްޔިތުން ހުޅުދޫ، މީދޫ، ގަން، ފޭދޫ އަދި ހިތަދޫއާ ދެމެދު ދަތުރުކުރެއެވެ.
ޝާހިދު އިތުރަށް ވިދާޅުވީ މިހާރު މަސައްކަތްކުރަމުން ގެންދަވަނީ ހުޅުދޫ އާއި މީދޫއަކީ ވަކި ސިޓީއެއްގެ ގޮތުގައި ހެދުމަށް ކަމަށެވެ.
އޭނާ އިތުރަށް ވިދާޅުވީ ރައީސުލްޖުމްހޫރިއްޔާ އައްޑުއަތޮޅުގެ ރައްޔިތުންނަށް ވެފައިވާ ވައުދުތައް ފުއްދުމަށް މިހާރުވެސް މަސައްކަތްތައް ކުރަމުންދާ ކަމަށެވެ.
