ޑިމޮކްރެޓްސް
ސުޕްރީމް ކޯޓު ފަނޑިޔާރުން ވަކިކުރުމުން ރާއްޖޭގެ ނަން ކިލަނބުވެއްޖެ: ދަ ޑިމޮކްރެޓްސް
ގުފްތަގް އަޖީރު
14 މޭ 2025 - 12:31:58
ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު މަހާޒު އަލީ ޒާހިރު ފަނޑިޔާރުކަމުން ވަކިކުރުމުން ރާއްޖޭގެ ނަން ކިލަނބުވެ، ބައިނަލްއަގުވާމީ ފެންވަރުގައި ގައުމަށް ބޮޑެތި ގެއްލުންތަކެއް ވަމުންދާ ކަމަށް ދަ ޑިމޮކްރެޓްސްއިން ބުނެފިއެވެ.
Advertisement
އެ ޕާޓީން ނެރުނު ނޫސްބަޔާނުގައި ބުނެފައިވަނީ ސަރުކާރުގެ ބާރާއި ނުފޫޒުން ފަނޑިޔާރުން ވަކިކުރުމުގެ އެންމެހައި ކަންކަން ހިންގާފައިވަނީ ނާއިންސާފުގެ މިސާލަކަށްވާ ފަދައިން ކަމަށެވެ.
ދަ ޑިމޮކްރެޓްސްއިން ބުނެފައިވަނީ ސަރުކާރުގެ މި އަމަލަކީ "މުޅި ޖުޑިޝަރީއަށް ބިރުދެއްކުމުގެ އަމަލެއް ކަމަށާއި، ތިން ބާރު ވަކިކުރެވިފައިވާ ނިޒާމެއް، އެއް ބާރުގެ މުށުތެރެއަށްލައި، ރާއްޖޭގެ ޑިމޮކްރަސީ ހަލާކުކޮށްލުމުގެ އަމަލެއް،" ކަމަށެވެ. އަދި ޖުޑިޝަރީގެ މިނިވަންކަމުގެ މަފުހޫމުގެ އެއް އަސާސަކީ ފަނޑިޔާރުންނަށް މަގާމުގެ ރައްކާތެރިކަން ކަށަވަރުވެފައި އޮތުން ކަމަށް ބުނެފައިވެއެވެ.
ދަ ޑިމޮކްރެޓްސްގެ ނޫސްބަޔާނުގައި އިތުރަށް ބުނެފައިވަނީ ފަނޑިޔާރުން ވަކިކުރުމުގެ މި އަމަލު އ.ދ. އާއި ބައިނަލްއަގުވާމީ ޖަމިއްޔާތަކުގެ ސަމާލުކަމަށް އައިސް އެފަރާތްތަކުން ވެސް ވަނީ އެކަން ވަރަށް ބޮޑަށް ކުށްވެރިކޮށްފައިވާ ކަމަށެވެ. އަދި މިކަމުގެ ސަބަބުން ދުނިޔޭގެ ކުރިމަތީގައި ވެސް ރާއްޖޭގެ ޖުޑިޝަރީއާ މެދު އިތުރުބާރު ގެއްލި، ސަރުކާރުގެ އަގުވެއްޓި، ރާއްޖޭގެ ނަން ކިލަނބުވެ ގޮސްފައިވުމީ މުޅި ގައުމަށް ލިބޭނޭ ބޮޑު ގެއްލުމެއް ކަމަށް ދަ ޑިމޮކްރެޓްސްއިން ބުނެފައިވެއެވެ.
0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް
