އަންނަ ހޯމަ ދުވަހުގެ ނިޔަލަށް އެ ޖަލްސާ ބާއްވާނެ ތަނެއް ސަރުކާރުން ހަމަޖައްސައިނުދީފި ނަމަ ހޯމަ ދުވަހުގެ ރޭ 9:00 އަށް މުލީއާގޭ ދޮށަށް އެމްޑީޕީއަށް ތާއީދު ކުރާ ހުރިހާ ފަރާތްތަކުން ދިޔުމަށް އެމްޑީޕީގެ ޗެއާޕާސްން ފައްޔާޒު ދައުވަތު އަރުވާފައިވެ އެވެ.
އެ ވާހަކައާ ގުޅުވައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިރޭ ވިދާޅުވީ ސަލްޓަން ޕާކު މަރާމާތުކުރަން ސިޓީ ކައުންސިލުން އެތަން މިނިސްޓްރީއާ ހަވާލުކޮށްފައިވާ ކަމަށެވެ. އަދި އޭގެފަހުން އެއްވެސް ބަޔަކަށް އެތަން ކުއްޔަށް ދީފައިނުވާ ކަމަށާއި އަދި ކުއްޔަށް ދިނުމަށް އުސޫލެއް ކަނޑައަޅާފައިނުވާ ކަމަށް ވެސް ވިދާޅުވި އެވެ.
އެކަމަކު، އެމްޑީޕީން އެދިގެން އެ ޕާޓީގެ ޖަލްސާ ބާއްވަން ސަލްޓަން ޕާކު ދޫކުރަން ނިންމާފައިވާ ކަމަށް، ސޯޝަލް މީޑިއާގައި ކުރި ޕޯސްޓުގައި މުއްތަލިބު ވިދާޅުވި އެވެ.
ފައްޔާޒުގެ ޕޯސްޓާ ގުޅިގެން ސަރުކާރުގެ ތަރުޖަމާނު ހީނާ ވަލީދު ރޭ ވިދާޅުވީ، ދުރާލާ ހުއްދަ ނުހޯދައި އެއްވުންތައް ބޭއްވޭނެ ތަންތަން ކަނޑައަޅައިފައިވާނެ ކަމަށާއި، އެފަދަ އެއްވުންތައް ބޭއްވުމުގެ ފުރުސަތު ނިމުނު އެމްޑީޕީ ސަރުކާރަށް ވުރެ މި ސަރުކާރުން ފުޅާކޮށްފައިވާނެ ކަމަށެވެ.
ނަޝީދާއި ޑިމޮކްރެޓްސްގެ މެންބަރުން އަލުން އެމްޑީޕީއާ ގުޅެން ނިންމީ އެ ޕާޓީން މިދިޔަ އަންގާރަ ދުވަހު ބޭއްވި ގައުމީ މަޖިލީހުގެ ބައްދަލުވުމެއްގައި ފާސްކުރި ގަރާރަކުންނެވެ.
