އައްޑޫ އިކުއިޓޯރިއަލް ހޮސްޕިޓަލުގައި ކެތެޓެރައިޒޭޝަން ލެބޯޓަރީ ނުވަތަ ކެތު ލެބް ގާއިމްކުރެވުނުތާ އެތައް ދުވަހެއްވީއިރުވެސް އެ ހިދުމަތް ފެށިފައި ނުވުމަކީ ވަރަށް ދެރަކަމެއްކަމަށް ވިދާޅުވެ ޕީއެންސީއަށް ނިސްބަތްވާ ހިތަދޫ މެދު ދާއިރާގެ މެމްބަރު އަހްމަދު އަޒާން މަރުޒޫގް ވަނީ ކަންބޮޑުވުން ފާޅުކޮށްފައެވެ.
އައްޑޫ އިކުއެޓޯރިއަލް ހޮސްޕިޓަލުގެ ކެތު ލެބުގެ ޚިދުމަތް ނުފެށި ލަސްވާ ސަބަބާ ގުޅޭގޮތުން އަޒާން، ކުރި ސުވާލަކަށް ލިޔުމުން ޖަވާބު ދެއްވަމުން ހެލްތު މިނިސްޓަރު ނާޒިމް ވިދާޅުވީ އެ ކެތު ލެބު ގާއިމުކުރުމަށް އިމާރާތަށް ގެންނަންޖެހޭ ބަދަލުތައް ގެނެސްފައިވާކަމަށެވެ. އަދި އެތަނަށް ބޭނުންވާ މެޝިނަރީސް އިންސްޓޯލް ކުރުމާ ގުޅުންހުރި މަސައްކަތްތަކުގެ 98 އިންސައްތަ މިހާރު ނިމިފައިވާކަމަށްވެސް މިނިސްޓަރު ނާޒިމް ވިދާޅުވިއެވެ.
މީގެ އިތުރުން އެ ކެތުލެބު ފުރިހަމަ ކުރުމަށް ގޮތުން އެތަން ހިންގާ ބެލެހެއްޓުމަށް ޝައުގުވެރިވާ ފަރާތްތައް ހޯދުމަށް މިހާރު އިއުލާނުކޮށްފައިވާކަމަށް ވެސް މިނިސްޓަރު ވިދާޅުވިއެވެ.
އޭއީއެޗްގެ ކެތު ލެބްގެ މަސައްކަތް ނިންމައިލީ 2023 ވަނަ އަހަރުގެ އޮކްޓޯބަރު މަހުގެ ތެރޭގަ އެވެ. އެތަނުން ކޮރޮނަރީ އެންޖިއޯގްރަފީ އާއި އިންވޭސިވް އަދި ނޮން-އިންވޭސިވް ފަރުވާތައް ދެވޭނެކަމަށް ސަރުކާރުން ވަނީ ބުނެފައެވެ.
