ތިން ދުވަހަށް ސިންގަޕޫރަށް ކުރެއްވި ރަސްމީ ދަތުރުފުޅު ނިންމާލެއްވުމަށްފަހު އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ މި ދަތުރުފުޅުގައި ތިމާވެށްޓާއި ދެމެހެއްޓެނިވި ތަރައްގީ، މަތީ ތައުލީމު، ޓެކްނިކަލް އަދި ވޮކޭޝަނަލް ތަމްރީނު؛ ސިންގަޕޫރު ކޯޕަރޭޝަން އެންޓަރޕްރައިޒްއާއެކު އެއްބާރުލުން؛ އަދި ތަޖުރިބާ ދަތުރުތަކުގެ ތެރެއިން ތަރައްޤީއަށް ޤާބިލުކަން އިތުރުކުރުމުގެ ޕްރޮގްރާމްތަކުގައި ދެ ގައުމުން އެމްއޯޔޫތަކުގައި ސޮއިކުރެވުނުކަމީ އުފާކުރާ ކަމެއް ކަމަށެވެ.
އަދި މޯލްޑިވްސް-ސިންގަޕޫރު ބިޒްނަސް ފޯރަމުން ވެސް ވިޔަފާރިއާއި އިންވެސްޓްމަންޓްގެ ފުރުސަތުތައް ފާހަގަކޮށްދިން ކަމަށް ރައީސް ވިދާޅުވި އެވެ.
ރައީސްގެ ދަތުރުފުޅުގެ ތެރެއިން ސިންގަޕޫރުގައި ވަނީ ރާއްޖޭގައި ހުރި އިންވެސްޓު ކުރުމުގެ ފުރުސަތުތަކާ ގުޅޭ މައުލޫމާތު ދިނުމަށް އިންވެސްޓުމެންޓު ފޯރަމެއް ވެސް ބާއްވައިފަ އެވެ.
ރައީސް މުއިއްޒު ސިންގަޕޫރަށް ކުރެއްވި ދަތުރުފުޅުގައި އެ ގައުމުގެ ރައީސް ތަރްމަން ޝަންމުގަރަނަމްގެ އާއި ބޮޑުވަޒީރު ލޯރެންސް ވޮންގްއާ ވެސް ބައްދަލުކުރެއްވި އެވެ. އަދި އެ ގައުމުގައި ފާހަގަކުރެވޭ ތަފާތު ތަންތަނަށް ޒިޔާރަތް ކުރައްވައި މައުލޫމާތު އޮޅުން ފިލުއްވި އެވެ.
މި ދަތުރުފުޅުގެ ތެރެއިން ރައީސްވަނީ ސިންގަޕޫރުގައި ދިރިއުޅޭ ދިވެހީންނާ ވެސް ބައްދަލު ކުރައްވައިފަ އެވެ.
