ދިރިއުޅުމުގެ އާދައިގެ ހިނގާގޮތުން ހިނގަމުންދިޔަ ލުހާގެ ހަޔާތަށް ކުއްލި ބަދަލެއް އައީ، ވާހަކަ ދެއްކުމުގައި ދަތިތަކެއް ހުރުމުން ފަރުވާ ހޯދަމުން ދަނިކޮށެވެ. ހަށިގަނޑުގެ ބޭރުފުށުން އެއްވެސް މައްސަލައެއް ނެތްކަމަށް ކުރިން ފެނުނު ނަމަވެސް، އެ ތުއްތު ކުއްޖާގެ ހާލަތު ބަދަލުވީ ހައިރާންކުރުވަނިވި ގޮތަކަށެވެ. ލުހާގެ މަންމަ، ޝިރުމީނާ އަބްދުﷲ ވަނީ "ސީއެންއެމް" އަށް ލުހާގެ ހާލަތުގެ ތަފްސީލުތައް ހިއްސާކޮށްފަ އެވެ.
ކެންސަރަށް ޕޮޒިޓިވް ވުމުގެ ކުރިން ލުހާ
އާއިލާއިން އެވަގުތު ބެލީ ވީހާވެސް އަވަހަކަށް މި ނުރައްކާތެރި ބަލިން ލުހާ ސަލާމަތް ކުރެވޭތޯ ކަމަށް ޝިރުމީނާ ބުންޏެވެ.
ޑޮކްޓަރާއި ސުވާލުކުރުމުން ޑޮކްޓަރު ބުނީ އޮޕަރޭޝަންގެ ސަބަބުން ދުޅަވެފައި ހުރިކަމަށާއި އެއީ ޓިއުމަރެއް ނޫންކަމަށެވެ. ނަމަވެސް، ޑޮކްޓަރު ސާމްޕަލްއަށް ނެގި އެތިކޮޅު ހޮސްޕިޓަލުން ބޮމްބޭއަށް ފޮނުވައިގެން ހެދި ޓެސްޓުން ހައިރާންކުރުވަނިވި ހަގީގަތެއް ހާމަވި އެވެ. އެއީ ކެންސަރަށް ބަދަލުވެފައިވާ ޓިއުމަރެއް ކަމަށެވެ.
އާސަންދަ އެހީގައި ލުހާ ގޮވައިގެން އާއިލާއިން ދެވަނަ ފަހަރަށް އިންޑިއާއަށް ފުރައިގެން ދިޔައީ ކިމްސް ހޮސްޕިޓަލަށެވެ.
ޓިއުމަރު ނެގުމަށްފަހު، ކިމްސް ހޮސްޕިޓަލުގެ ޑޮކްޓަރު ވިދާޅުވީ އެ ހޮސްޕިޓަލުގައި ލުހާ އަށް ދެވޭނެ ތެރަޕީއެއް ނެތް ކަމަށާއި ލުހާގެ ޓިއުމަރަކީ ދުނިޔޭގެ 14 މިލިއަނުން އެކަކަށް ޖެހޭ ވައްތަރުގެ ޓިއުމަރެއް ކަމަށާއި ޑޮކްޓަރުގެ ހަޔާތުގައި ވެސް މިވަރުގެ ނުރައްކާތެރި ޓިއުމަރެއް ނުދެކޭ ކަމަށް ބުނި ކަމަށެވެ. މި ފަރުވާ ދެވޭނެ އޭޝިއާގައި ހުރީ އެންމެ ދެތަނެއްކަމަށް ވެސް ޑޮކްޓަރު ބުނި ކަމަށް ޝިރުމީނާ ބުންޏެވެ.
ލުހާގެ ހާލަތު އަންގައިދޭ ބައެއް ޑޮކަޓްރުންގެ ލިޔުން ތަކަކާއި ރިޕޯޓް ތަކެއް
ކިމްސް ހޮސްޕިޓަލުގެ ޑޮކްޓަރުން ބުނީ ލުހާއަށް ބޭނުންވާ "ޕްރޮޓޮން ތެރަޕީ" ދެވެން ހުރީ ޗެންނާއީގެ އެޕޯލޯ ހޮސްޕިޓަލުންނާއި ބޮންބޭގެ ޓާޓާ މެމޯރިއަލް ހޮސްޕިޓަލުންކަމަށެވެ. އަދި ޑޮކްޓަރުން ލަފާދިނީ ބޮންބޭގެ ޓާޓާ ހޮސްޕިޓަލަށް ދިއުމަށް ކަމަށް ވެސް ޝިރުމީނާ ބުންނެވެ.
ޓިއުމާ ނެގުމަށްފަހު، ލުހާގެ އެއް ލޮލުން މިހާރު ނުފެންން ކަމަށްވެސް ލުހާގެ މަންމަ ޝިރުމީނާ ބުންޏެވެ. އަމިއްލަ ޒާތުގައި އެ ލޯ ނުވެސް ނުހުޅުވޭ ކަމަށާއި ކަޅި ވެސް ހަރަކާތް ނުކުރާކަމަށް އަދި ރާއްޖެއިން ކުރި އޮޕަރޭޝަންގެ ކުރިން ވެސް ކަޅި ހަރަކާތް ނުކުރަން ފެށިއިރު، މިއީ އުފާވެރިކަމާއެކު ކުރިން ކުޅެ އުޅުނު ކުޑަކުޑަ ލުހާއަށް ލިބުނު ބޮޑު ހިތްދަތިކަމެއް ކަމަށް ޝިރުމީނާ ބުނެއެވެ. ކެންސަރު ބަލިން ސަލާމަތްވުމަށް ފަރުވާ ފުރިހަމަކުރުމަށް އާއިލާއިން އެދެނީ ވީހާވެސް ގިނަ މީހުން ވެވުނު މިންވަރަކުން އެހީތެރިކަން ފޯރުކޮށްދިނުމަށެވެ.
އިތުރު މައުލޫމާތު:
ލުހާގެ މަންމަގެ ރުފިޔާ އެކައުންޓު ނަންބަރު: 7701173437101 ( ޝިރުމީނާ އަބްދުﷲ )
ލުހާގެ މަންމަގެ ޑޮލަރު އެކައުންޓު ނަންބަރު: 7730000690600 ( ޝިރުމީނާ އަބްދުﷲ )
ލުހާގެ ބޮޑުދައިތަގެ ރުފިޔާ އެކައުންޓް ނަމްބަރު: 7730000752653 ( ބަދޫރާ އާދަމް )
ލުހާގެ ބޮޑުދައިތަގެ ޑޮލަރު އެކައުންޓް ނަމްބަރު: 7730000752710 ( ބަދޫރާ އާދަމް )
ސީއެންއެމް އެހީ މި ސެގްމަންޓްގެ ދަށުން ގެނެސްދޭ ފަރާތްތަކަށް އެހީތެރިވުމަށް އެދޭ ފަރާތްތަކުން އެ އާއިލާއާ ގުޅައިގެން އެހީގެ ކަންކަން ކުރިއަށް ގެންދިއުން އެދެމެވެ.
