މި ރިޕޯޓަކީ، ދިވެހި އަދި ސްރީ ލަންކާގެ ކަމާބެހޭ އިދާރާތަކުގެ އިތުރުން، ބޭރުގެ މީޑިއާ ރިޕޯޓުތަކާއި، އިންޓަނޭޝަނަލް އިދާރާތަކުގެ މައުލޫމާތުގެ އަލީގައި، މި ބޮޑު އޮޕަރޭޝަނުގެ ފުޅާ މަންޒަރު ބަލައިލުން މުހިންމެވެ.
މި އޮޕަރޭޝަން ފެށިގެން އައީ ސްރީ ލަންކާގެ އިދާރާތަކަށް ލިބުނު ހާއްސަ މައުލޫމާތަކާ ގުޅިގެންނެވެ. އެ މައުލޫމާތު ރާއްޖޭގެ މޯލްޑިވްސް ޕޮލިސް ސާވިސްއާ ހިއްސާކުރުމާ އެކު، ދެ ގައުމުގެ ސަލާމަތީ ބާރުތައް ގުޅިގެން ވަރަށް ރޭވުންތެރި އޮޕަރޭޝަނެއް ފެށިއެވެ. ނޮވެމްބަރު މަހުގެ 7 ވަނަ ދުވަހު، "އަވިޝްކާ ޕުތާ" ރާއްޖޭގެ ކަނޑުގެ ސަރަހައްދަށް ވަދެފައިވާކަން ދެނެގަނެވި، އެ ބޯޓު ހިފެހެއްޓުނެވެ.
ލަންކާ މަސް ބޯޓެއް
ތިން ދުވަސް ފަހުން، ނޮވެމްބަރު 10 ވަނަ ދުވަހު ކޯޓު އަމުރެއްގެ ދަށުން ބޯޓު ފާސްކުރިއިރު، ތަހުގީގު ޓީމުތަކަށް ފެނުނީ އާދައިގެ މަސް ބޯޓެއްގެ ތެރޭގައި ފޮރުވާފައިވާ މަސްތުވާތަކެތީގެ ބޮޑު ސްޓޮކެކެވެ. ފޮރުވާފައި ހުރީ، 24 ގޯންޏަށް އަޅައިގެން ކަމަށް ރިޕޯޓުތައް ބުނެއެވެ. ބޯޓުގައި ޖުމްލަ 355.9 ކިލޯގެ މަސްތުވާތަކެތި ހުރިކަމަށް ރިޕޯޓުތައް ބުނެއެވެ. އޭގެ ތެރޭގައި، 58.6 ކިލޯގެ ހެރޮއިން އާއި، 297.3 ކިލޯގެ މެތަންފެޓަމިން ހިމެނެއެވެ.
ފަހަތުގައި ބޮޑު ނެޓް ވޯކެއް:
މި މައްސަލައާ ގުޅިގެން އުމުރުން 28 އަހަރާއި 63 އަހަރާ ދެމެދުގެ ސްރީ ލަންކާގެ ފަސް މަސްވެރިއަކު ހައްޔަރުކުރެވުނެވެ. މައްސަލަ ކޯޓަށް ހުށަހެޅުމުން، މިއީ އާދައިގެ ކުށެއް ނޫން ކަމަށާއި، މީގެ ފަހަތުގައި އޮތީ ބޮޑު އިންޓަނޭޝަނަލް ނެޓްވޯކެއް ކަމަށް ބެލެވޭތީ، ތަހުގީގު ފުރިހަމަ ކުރުމަށްޓަކައި އެ މީހުން ބަންދުގައި ބޭތިއްބުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ބެލެވޭ ގޮތުގައި މިފަދަ ނެޓްވޯކްތަކުން ޕާކިސްތާނުގެ އައްސޭރިފަށް އަދި އީރާން ފަދަ ގައުމުތަކުން "މަދާ ޝިޕް" ތަކަށް މަސްތުވާތަކެތި އަރުވައިގެން އައިސް، އިންޓަނޭޝަނަލް ކަނޑުގެ ސަރަހައްދުތަކާ ރާއްޖެ ފަދަ ގައުމުތަކުގެ އިގްތިސާދީ ސަރަހައްދު ތެރެއިން، މަސްވެރިކަން ކުރުމުގެ ނަމުގައި އުޅޭ "އަވިޝްކާ ޕުތާ" ފަދަ ކުދި އުޅަނދުތަކަށް އެ ތަކެތި ބަދަލުކުރެއެވެ.
މި އުކުޅުގެ ސަބަބުން، ކަމާބެހޭ ފަރާތްތަކަށް ފިލައިގެން، އެ ތަކެތި ސްރީ ލަންކާ ނުވަތަ އެހެން މަންޒިލަކަށް ގެންދިއުމަށް މަގުފަހިވެއެވެ.
ދިއްފުށި ކައިރިން އަތުލައިގެން ލަންކާ ބޯޓެއް
ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) ގެ ތަފާސްހިސާބުތައް ދައްކާ ގޮތުގައި، 2019 ވަނަ އަހަރުން ފެށިގެން އިންޑިއާ ކަނޑުމަސްތުވާތަކެތީގެ މިފަދަ އޮޕަރޭޝަންތައް ހިނގައެވެ. ހާއްސަކޮށް، އަފްގާނިސްތާނުގައި އުފައްދާ މެތަންފެޓަމިން (އައިސް) ބޭނުންކޮށްގެން ދެކުނު އޭޝިއާ އަދި އެފްރިކާގެ ގައުމުތަކަށް ފޯރުކޮށްދެއެވެ.
އިންޓަނޭޝަނަލް ތަހުގީގެއް އަންނަނީ ހިންގަމުން:
"އަވިޝްކާ ޕުތާ" އޮޕަރޭޝަނަކީ މި ބޮޑު މައްސަލައިގެ ހަމައެކަނި ކުޑަ މިންވަރެއްކަމަށް ރިޕޯޓުތައް ބުނެއެވެ.
މި ހާދިސާއިން ލިބޭ ފިލާވަޅަކީ، ރާއްޖޭ ކަނޑުގެ ސަރަހައްދު ވެސް މިފަދަ އިންޓަނޭޝަނަލް ކުށްތަކުގެ ނުރައްކަލަށް ހުށަހެޅިފައިވާ ކަމެވެ. އަދި، މިފަދަ ނުރައްކާތަކުން ރައްކާތެރިވުމަށްޓަކައި ސަރަހައްދީ ގައުމުތަކާ ގުޅިގެން މަސައްކަތް ކުރުމުގެ މުހިންމުކަމެވެ.
