ޕަރީގެ ޓީމުން މި ވަނީ ދާދި ފަހުން އެ ފިލްމުގެ ޗެޕްޓާރް 2 ގެ ޕޯސްޓަރުވެސް ރިލީޒް ކޮށްފައި އެވެ.
މި ޕޯސްޓަރު ރިލީޒް ކޮށްފައިވަނީ ކުޅުދުއްފުށީގައި އެވެ.
ޕަރީގެ އެއް ޕްރޮޑިއުސަރު އަލީ ސީޒަން "ސީއެންއެމް" އަށް ވާހަކަ ވިދާޅުވީ ޕަރީ ޗެޕްޓާރް 1 އަށް ވަރަށް ގިނަ ބައެއް ސަޕޯޓް ލިބިފައިވާ ކަމަށާއި ގަބޫލު ކުރަނީ ޗެޕްޓާރް 2 އަށް ހަމަ އެ ވަރަށް ސަޕޯޓް ލިބޭނެ ކަމަށެވެ.
ދެ ވަނަ ބައިގެ ޕޯސްޓަރަށް ނަޒަރު ހިންގާލާ އިރު ހިތުގައި ވަރަށް ބައިވަރު ސުވާލު އުފެދެ އެވެ. ދެން އެކަމު އެ ސުވާލުތަކަށް ޖަވާބު ހޯދަން ޖެހޭނީ މި ފިލްމު ނިކުންނަދެން އިންތިޒާރު ކޮށްލަން ތާ އެވެ.
ޕަރީ 2 ވަނަ ބައިގެ ޕޯސްޓަރު
ޗެޕްޓާރް 2 ނެރެން ނިންމާފައިވަނީ އަންނަ މަހުގެ 6 ވަނަ ދުވަހު އެވެ.
ސީޒަން ފާހަގަ ކުރިގޮތުގައި 2 ވަނަ ބައިގައި ވަރަށް ބޮޑަށް ތަފާތު ވެގެން ދާނެ ކަމަށާއި ހީނުކުރާ އެތަށް ބައިވަރު ޓްވިސްޓް ތަކެއް އަންނާނެ ކަމުގަ އެވެ.
ޕަރީ އަކީ އަހުމަދު އަހުސަން އާއި އަލީ ސީޒަން އާއި އެކުވެގެން ޕްރޮޑިއުސްކުރާ ފިލްމެކެވެ.
ފިލްމްގެ ކާސްޓުންގެ ތެރޭގައި ޝީލާ ނަޖީބް، ރިޝްމީ ރަމީޒް، އައިޝަތު ލަމްސާ ލަތީފް، ޖުމައްޔިލް ނިމާލް، މުހައްމަދު ނައުޝާދު އަލީގެ އިތުރުން އަލީ ސީޒަން ފަދަ މޫނުތައް ފާހަގަކޮށްލެވެއެވެ.
ގިނަ ބަޔަކު ބުނަމުން އަންނަ ގޮތުގައި ޕަރީ ގެ ފުރަތަމަ ބައި ވެގެން ގޮސްފައިވަނީ ދިވެހި ބިރުވެރި ފިލްމު އިންޑަސްޓްރީ އަށް ބޮޑު އިންގިލާބެއް ގެނައި ފިލްމަކަށް ކަމުގައި އެވެ.
މި ފިލްމުން ފެނިގެންދާ ޕަރީ ( އައިޝަތު ލަމްސާ ލަތީފް) އަށް ތައުރީފުގެ ބަސްތައް ވަނީ އާންމުން އަދި ބެލުންތެރިންވެސް އޮއްސާލާފައި އެވެ. ކުޑަ ކުޑަ ޕަރީގެ މޮޅު އެކްޓިން ފެނިގެން އާސޯހުނުވާ ހަމަ އެކަކުވެސް ނެތޭ ބުނިޔަސް އެއީ ދޮގަކަށް ނުވާނެ އެވެ.
ގިނަ ބަޔަކުު ވަނީ މި ފިލްމު ހޮލީވުޑް އަދި ބޮލީވުޑްގެ މޮޅެތި ފިލްމުތަކާއި އެއް ފަންތިއެއްގައި ފައި ވިއްދާލާނެ ކަމަށް ފާހަގަ ކޮށްލާފައި އެވެ.
