މިކަމުގެ އެންމެ ބޮޑު އެއް މިސާލަކީ ދާދި ފަހުން އޮތް އެކެޑަމީ އެވޯޑްސްގައި ލިއޮނާޑޯ ޑިކެޕްރިއޯ ފެނުނު ގޮތެވެ. އުމުރުން ފަންސާސް އެއް އަހަރުގެ މި ތަރި ފެނުނީ ވަރަށް ބޮޑަށް ޒުވާންކޮށެވެ. މީހުން ވަނީ އޭނާ ރާބުއިން ހުއްޓާލީ ކަމަށް ނުވަތަ މޫނަށް ހާއްސަ ފަރުވާތަކެއް ހޯދަން ފެށީ ކަމަށް ބުނެ ވަރަށް ބޮޑަށް ތައުރީފުކޮށްފައެވެ. ގިނަ ބަޔަކު ދެކުނު ގޮތުގައި މިއީ އޭނާއަށް އައިސްފައިވާ ވަރަށް ރަނގަޅު ބަދަލެކެވެ.
މީގެ އިދިކޮޅަށް، އުމުރުން ފަސްދޮޅަސް ހަތަރު އަހަރުގެ ޖިމް ކެރީއަށް އާންމުންގެ ފަރާތުން ލިބުނީ ވަރަށް ހިތްދަތި ފާޑުކިޔުންތަކެކެވެ. ޕެރިސްގައި އޮތް އެވޯޑް ހަފުލާއަކުން އޭނާ ފެނުނުއިރު، މޫނު ހުރީ ވަރަށް ބޮޑަށް ވާންވެފަ އެވެ. މިއާއެކު ސޯޝަލް މީޑިއާގައި ގިނަ ބަޔަކު ވަނީ އޭނާއަށް ވަރަށް ބޮޑަށް މަލާމާތްކޮށްފަ އެވެ. އަދި އެއީ އަސްލު ޖިމް ކެރީ ނޫން ކަމަށާއި އެއީ އެހެން މީހެއް ކަމަށް ވެސް ބައެއް މީހުން ވަނީ ބުނެފަ އެވެ.
ފިރިހެނުންގެ ސިފަޔަށް މިހާ ބޮޑަށް މީހުންގެ ސަމާލުކަން ހުއްޓެން ފަށާފައިވަނީ، އާންމު ފިރިހެނުންގެ މެދުގައި ވެސް ރީތިވުމަށް ކުރާ ފަރުވާތައް ގިނަވުމުންނެވެ. އެމެރިކާ އާއި އިނގިރޭސިވިލާތުގައި ސާޖަރީ ހަދާ މީހުންގެ ތެރެއިން ހަ ޕަސަންޓު މީހުންނަކީ މިހާރު ފިރިހެނުންނެވެ. އަދި ފިރިހެނުން މޫނަށް ޖަހާ އިންޖެކްޝަންތަކާއި، މޫނުގެ ހަންގަނޑު ދަމަން ހަދާ ސާޖަރީތައް ވެސް ދަނީ ވަރަށް ބޮޑަށް އިތުރުވަމުންނެވެ.
މި ކަންކަމުން ދައްކައިދެނީ، ފިރިހެނުން މުސްކުޅިވިޔަސް އެއްވެސް ފާޑުކިޔުމެއް ނެތި އުޅެވޭ ޒަމާން މިހާރު މާޒީވަމުންދާ ކަމެވެ. ރީތިވުމުގެ ނަމުގައި މުޖުތަމައުއިން އަންހެނުންނަށް ކުރަމުން އައި ނޭދެވޭ ބާރުތައް މިހާރު ފިރިހެނުންނާ ވެސް ކުރިމަތިލާން ޖެހިއްޖެ ކަމަށް ތަޖުރިބާކާރުން ބުނެއެވެ. މިއީ ޒުވާންކަން ދެމެހެއްޓުމަށް އިންސާނުން ކުރާ މަސައްކަތްތައް އިތުރުވެ، މުސްކުޅިވުމަކީ ބިރެއް ކަމުގައި ދެކޭ މިންވަރު އިތުރުވަމުންދާ ކަމުގެ ހެއްކެކެވެ.
