މި އޮފީސް ހުޅުވައިދެއްވީ، އިޖްތިމާއީ އަދި އާއިލީ ތަރައްގީއާއިބެހޭ ވަޒީރު ޑރ. އާއިޝަތު ޝިހާމް އެވެ.
އައްޑޫ ހިތަދޫގައި އެންސްޕާ އާއި އާސަންދައިގެ އޮފީހެއް ހުޅުވުމުން މިއަދު ބޭއްވި ރަސްމިއްޔާތުގައި އައިޝަތު ޝިހާމް ވިދާޅުވީ އެއީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން، ލާމަރުކަޒީ ނިޒާމުގެ ތެރެއިން ރައްޔިތުންނާ ވީހާ ވެސް ގާތުން ހިދުމަތްތައް ދިނުމަށް މި ސަރުކާރުން ކުރަަމުން އަންނަ މަސައްކަތުގެ ދަށުން ހުޅުވި ތަނެއް ކަމަށެވެ.
އޭނާ ވިދާޅުވީ ލާމަރުކަޒީ ނިޒާމުގެ ތެރެއިން ރައްޔިތުންނަށް ހިދުމަތް ފޯރުކޮށްދިނުމަށް ސަރުކާރުގެ ސިޔާސަތުތައް ބައްޓަންކުރަމުން އަންނަނީ ހަމައެކަނި މާލެ އަށް މަރުކަޒުވެފައި އޮތް ހިދުމަތްތައް ރަށްރަށަށް ބަހާލައި، ރައްޔިތުންނާ ވީހާވެސް ގާތުން ހިދުމަތްތައް ފޯރުކޮށްދިނުމަށް ކަމަށެވެ.
އެންސްޕާގެ ސީއީއޯ ހީނާ ވަލީދު ވިދާޅުވީ އައްޑޫގައި މިފަދަ އޮފީހެއް ހުޅުވިގެން ދިޔުމަކީ ދެކުނުގެ ރައްޔިތުންނަށް ގިނަގުނަ ފަސޭހަތަކެއް ލިބިގެންދާނެ ކަމެއް ކަމަށާއި އާސަންދަ އާއި އެންސްޕާގެ ހިދުމަތްތަކަކީ ވަރަށް ބޮޑަށް ޑިޖިޓަލައިޒް ކުރެވިފައިވާ ހިދުމަތްތަކެއް ނަމަވެސް ބޮޑެތި ސިޓީތަކުގައި އޮފީސްތައް ހުޅުވައި މުވައްޒަފުން ހަރަކާތްތެރިވާންޖެހޭ ކަމަށެވެ.
މީގެކުރީގެ އެއްވެސް ސަރުކާރަކުން މިފަދަ ކަމަކަށް ވިސްނުން ގެންގުޅެފައި ނުވާ ކަމަށާއި ނަމަވެސް ރައީސް ޑރ. މުހައްމަދު މުއިއްޒު އެ ވިސްނުންފުޅު ގެންގުޅުއްވާ މިފަދަ ކަމަކަށް އިރުޝާދު ދެއްވީ ރައްޔިތުންގެ ހާލު ދެނެގަތުމަށް އެމަނިކުފާނު ގެންގުޅުއްވާ އަހައްމިޔަތުކަމުގެ ސަބަބުން ކަމަށް ހީނާ ވިދާޅުވި އެވެ.
