"މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ރަސްމާލޭގައި ބޮޑު މަޝްރޫއެއް ހިންގަން ޔޫއޭއީގެ ރިއަލް އެސްޓޭޓްގެ އެންމެ ބޮޑު އެއް ކުންފުނި ކަމަށްވާ އީގަލް ހިލްސްއާ އެކު ސަރުކާރުން ވަނީ ކޮމާޝަލް ޓާމްސް އެއްބަސްވުމެއްގައި ސޮއިކޮށްފަ އެވެ. 

އެކަމާ ގުޅިގެން ކުރެއްވި ޕޯސްޓެއްގައި ޒަރީރު ވިދާޅުވި ގޮތުގައި އެއީ 500 ހެކްޓަރުގެ ސަރަޙައްދެއްގައި 20 ބިލިއަން ޑޮލަރުގެ "ވޯޓަ ފްރަންޓް އެންޑް މެރީނާ" މަޝްރޫއެއް 10 އަހަރު ދުވަހުގެ މުއްދަތަށް ބަހާލައިގެން ތަރައްގީކުރުމަށް ވެފައިވާ އެއްބަސްވުމެކެވެ. އަދި އެ މަޝްރޫއުގެ ދަށުން ދިރިއުޅޭނެ ގެދޮރާއި ހޮޓާތަކާއި ރިސޯޓުތަކާއި މެރީނާގެ އިތުރުން ފިހާރަތަކާއި އޮފީސްތަކާއި ތައުލީމީ އަދި ސިއްހީ ހިދުމަތްދޭ މަރުކަޒުތައް ގާއިމުކުރުމަށް ވަނީ ޕްލޭންކޮށްފަ އެވެ.

އެކްސްގައި ކުރެއްވި ޕޯސްޓެއްގައި ޒަރީރު ވިދާޅުވި ގޮތުގައި 10 އަހަރުގެ ތެރޭގައި 11 ބިލިއަން ޑޮލަރު ލިބޭނެ ކަމަށް ލަފާކުރެވޭއިރު އެއީ އަހަރަކު އެވްރެޖްކޮށް ގާތްގަނޑަކަށް 1.1 ބިލިއަން ޑޮލަރު ކަމަށެވެ. މިނިސްޓަރު ވިދާޅުވި ގޮތުގައި މިއީ ރާއްޖޭގެ ފަތުރުވެރިކަމުގެ ސިނާއަތް އިތުރަށް ވަރުގަދަވެ، ދިގު މުއްދަތުގެ އިގުތިސޯދީ ކުރިއެރުމަށް މަގުފަހިވެގެންދާނެ ކަމެކެވެ.

މިނިސްޓަރު ވިދާޅުވީ އީގަލް ހިލްސް އިން ތަންތަން ވިއްކުމަށްފަހު އެ ކުންފުންޏަށް ލިބޭ ފައިސާ ބަހައްޓަންޖެހޭނީވެސް ރާއްޖޭގައި ހުޅުވާފައިވާ އެސްކްރޯ އެކައުންޓެއްގައި ކަމަަށެވެ. އެހެންވެ އީގަލް ހިލްސްއަށް ލިބެންޖެހޭ ފައިސާ ލިބެމުންދަނީ އެއްބަސްވުމުގައިވާ ގޮތަށް ކަމަށްވެސް ވިދާޅުވި އެވެ. އަދި މިމަޝްރޫއާ ގުޅޭ ފައިސާގެ ހުރިހާ މުއާމަލާތެއް ކުރަންޖެހެނީވެސް ދިވެހި ބޭންކުތައް މެދުވެރިކޮށް ކަމަށްވެސް މިނިސްޓަރު ވިދާޅުވި އެވެ.

މިނިސްޓަރު ހަސަން ޒަރީރު ވިދާޅުވީ މި އެއްބަސްވުމުގެ ދަށުން ޓެކްސް އަދި ޑިއުޓީ މާފު ނުވާނެ ކަމަށާއި މި މަޝްރޫއު ތަރައްގީ ކުރުމަށް ސަރުކާރުން އެއްވެސް ލޯނެއް ނުނަގާނެ ކަމަށެވެ. އަދި ސޮވެރިން ގެރެންޓީ އެއްވެސް ނުދޭނެ ކަމަށް ވިދާޅުވި އެވެ.

މާލެއިން ފުރައިގެން ސްޕީޑްބޯޓުގައި 17 މިނެޓުން ދެވޭ ރާސްތާގައި އޮތް ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލޭގައި އީގަލް ހިލްސްއިން ގާތްގަނޑަކަށް 500 ހެކްޓަރުގެ ސަރަހައްދެއް ތަރައްގީކުރާނެ އެވެ. މިއީ އާންމު ރިސޯޓަކަށް ވުރެ ބޮޑަށް، ފެންވަރު ރަނގަޅު ގެދޮރާއި، ހޮޓާތަކާއި، މަރީނާއަކާއި، ވިޔަފާރިކުރާ ތަންތަނުގެ އިތުރުން ސިއްހީ އަދި ތައުލީމީ ހިދުމަތްތައް ހިމެނޭ ގޮތަށް ފަރުމާކުރާ ފުރިހަމަ ސަހަރެކެވެ. ބިމަށް އަގެއް، ކުއްޔެއް ނުނަގާ ގޮތަށް ރަސްމާލެއިން 500 ހެކްޓަރު ދޫކޮށްލާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ. 

ރަސްމާލޭ ގައި ކުރިއަށް ގެންދާ މި ބިޔަ މަޝްރޫޢުގެ ދަށުން ބައިނަލްއަގްވާމީ ފެންވަރުގެ ހޮޓާތަކާއި ރިސޯޓުތަކާއި މަތީ ފަންތީގެ ބްރޭންޑެޑް ރެޒިޑެންސްތައް ތަރައްގީ ކުރުމަށް ހަމަޖެހިފައިވެ އެވެ. އަދި ދުނިޔޭގެ ފެންވަރުގެ މެރީނާއަކާއި ރެސްޓޯރެންޓްތަކާއި، ފިހާރަތައް އަދި ހިތްހަމަޖައްސައިލުމާއި ދުޅަހެޔޮކަމަށް ހާއްސަ ސެންޓަރުތައް ވެސް ގާއިމު ކުރާނެ އެވެ.

މި މަޝްރޫއުގެ ކޮމާޝަލް ޓާމްސް އެއްބަސްވުމުގައި މިދިޔަ ހަފްތާ ސޮއިކޮށްފައިވާއިރު މި މަޝްރޫއާ ގުޅިގެން ސިޔާސީ ބައެއް ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ. މިއީ ރަސްމާލޭގެ ބިން "ވިއްކާލުން" ކަމަށް ބުނެ އެއްބަސްވުން އާންމު ކުރުމަށް ވެސް އަންނަނީ ގޮވާލަމުންނެވެ.

މަޝްރޫއުގެ މުހިންމު ތަފްސީލުތައް:

• ތަރައްގީކުރާ ތަން: ވެރިރަށް މާލެއިން ފުރައިގެން ލޯންޗުގައި ގާތްގަނޑަކަށް 17 މިނެޓުން ދެވޭ ފުށިދިއްގަރު ފަޅުގައި ހިއްކަމުންދާ "ރަސްމާލެ" ސިޓީގައެވެ.
• ހިމެނޭ ބައިތައް: ބައިނަލްއަގުވާމީ ފެންވަރުގެ ހޮޓާތަކާއި ރިސޯޓުތައް، ޕްރީމިއަމް އަދި ބްރޭންޑެޑް ރެޒިޑެންސްތައް، ދުނިޔޭގެ ފެންވަރުގެ މެރީނާއެއް، ވޯޓާފްރަންޓް ޕްރޮމެނާޑްތައް، ރެސްޓޯރެންޓްތަކާއި ފިހާރަތައް، އަދި މުނިފޫހިފިލުވުމާއި ދުޅަހެޔޮކަމުގެ މަރުކަޒުތައް (ވެލްނެސް ސެންޓަރުތައް).
• އިންވެސްޓްމަންޓް: އެކި ފިޔަވަހިތަކަށް ބަހާލައިގެން ކުރިއަށްގެންދާ މި މަޝްރޫއުގެ ޖުމްލަ އިންވެސްޓްމަންޓް 20 ބިލިއަން ޑޮލަރަށް އަރާނެ ކަމަށް އަންދާޒާކުރެވެއެވެ.
• އިގްތިސާދީ ފައިދާ: މި މަޝްރޫއުގެ ދަށުން ރާއްޖެއަށް 30 ބިލިއަން ޑޮލަރަށް ވުރެ ގިނަ ބޭރުގެ އިންވެސްޓްމަންޓް ލިބޭނެ ކަމަށް ބެލެވޭއިރު، އޭގެ ތެރޭގައި 18 ބިލިއަން ޑޮލަރުގެ ނެޓް އިންވެސްޓްމަންޓް ހިމެނެއެވެ. އަދި ސީދާ އަދި ނުސީދާ ގޮތުން 54،000 އަށް ވުރެ ގިނަ ވަޒީފާ އުފެދިގެންދާނެއެވެ.