މި ޕޮޑްކާސްޓުގައި ނޯރާ ވަނީ އޭނާގެ ކާމިޔާބީގެ ފަހަތުގައިވާ އުނދަގޫ ދަތުރާއި، އަމިއްލަ ދިރިއުޅުމުގައި ކުރިމަތިވި ހިތްދަތި ތަޖުރިބާތަކުގެ ވާހަކަ ދައްކާފަ އެވެ. ހާއްސަކޮށް އަންހެނަކަށް ވީތީ ފިލްމީ ދާއިރާގައި ކުރިމަތިވާ ގޮންޖެހުންތަކާއި މުޖުތަމައުގެ އުންމީދުތަކާ މެދު ނޯރާ ވަނީ ފުންކޮށް ވާހަކަދައްކާފައެވެ.
ނޯރާ ބުނީ އޭނާގެ ހިތްވަރަކީ އޭނާގެ މަންމަ ކަމަށާއި، ބައިނަލްއަގުވާމީ މިއުޒިކް ދާއިރާއަށް ވަނުމަށް ކުރާ މަސައްކަތަކީ އޭނާގެ ވަރަށް ބޮޑު ހުވަފެނެއް ކަމަށެވެ. މީގެ އިތުރުން ސޯޝަލް މީޑިއާގައި އޭނާއަށް އަމާޒުވާ ފާޑުކިޔުންތަކާއި، އީރާނާއި އިސްރާއީލުގެ މައްސަލައިގައި އޭނާ ދެއްކި ވާހަކަތަކާ ގުޅިގެން ދިމާވި ކަންކަމަށްވެސް ނޯރާ ވަނީ ރައްދުދީފައެވެ. ލިލީ ސިންގް ބުނީ ނޯރާއަކީ ކަންކަމާ މެދު ވަރަށް ފާޅުކަން ބޮޑުކޮށް ވާހަކަދައްކާ، އަމިއްލަ ނަފްސަށް އިތުބާރުކުރާ ފަންނާނެއް ކަމަށެވެ.
މި ޕޮޑްކާސްޓުގައި ދެމީހުން ވަނީ އާންމުކޮށް މީހުން ދައްކަން ޖެހިލުންވާ ކަންކަމާ މެދުވެސް މަޝްވަރާކޮށްފައެވެ. އޭގެ ތެރޭގައި ޑޭޓްތަކަށް ދާއިރު ފައިސާ ދައްކަންޖެހޭނީ ކާކުތޯ ކުރެވޭ ސުވާލުތައް ފަދަ މަޖާ އަދި ސީރިއަސް މައުލޫއުތައް ހިމެނެ އެވެ.
"ޝޭމް ލެސް" އަކީ އިންސާނީ ހަގީގަތްތަކާ ގުޅޭގޮތުން ލިލީ ގެނެސްދޭ ވަރަށް މަގުބޫލު ޕޮޑްކާސްޓެކެވެ. ނޯރާ ބައިވެރިވި މި އެޕިސޯޑަކީ މިހާތަނަށް މި ޕޮޑްކާސްޓުގައި ގެނެސްދިން އެންމެ ފާޅުކަން ބޮޑު އެއް ވާހަކަ ކަމަށް ގިނަ ބަޔަކު ގަބޫލުކުރެ އެވެ.
