ޝަހީމްގެ ކޮއްކޮ އިބްރާހީމް ނަސީމް "ސީއެންއެމް" އަށް ބުނީ، މިދިޔަ އަހަރު ދޭތެރެ ދޭތެރެއިން ބޭބެގެ ބޮލަށް އެނބުރުން އަރައިގެން ވެއްޓުން ފަދަ ކަންކަން ދިމާވި ކަމަށެވެ. އަދި އެ އަހަރު މާލެ ގޮސް ޑޮކްޓަރަށް ދައްކަން ފެށި ކަމަށާއި، އޭރު ހެދި ޓެސްޓުތަކުގެ ނަތީޖާއިން ޝަހީމްގެ މޭދަށުގައި 6.8 ސެންޓިމީޓަރުގެ ޓިއުމަރެއް އުފެދިފައިވާކަން އެނގުނުކަމަށް ނަސީމް ބުންޏެވެ. އޮގަސްޓް 25 ވަނަ ދުވަހު އެކަން އެނގުމާއެކު އިތުރަށް ހެދި ޓެސްޓުތަކުން ދެއްކީ ޝަހީމްގެ ގޮހޮރުގައި ކެންސަރު ހުރި ކަމަށެވެ. އެއާއެކު އާއިލާއިން ޝަހީމް ގޮވައިގެން ސެޕްޓެމްބަރު މަހު އިންޑިއާއަށް ގޮސް ކޮޗިންގެ އަމްރިތާ ހޮސްޕިޓަލްގައި ފަރުވާ ފެށި އެވެ.
ޝަހީމްގެ ބަލި ހާލަތު އަންގައިދޭ ލިޔުމެއް
ޝަހީމްގެ ހަށިގަނޑުގައި އުފެދިފައިވާ ޓިއުމަރު ބޮޑުވުމުން ޑޮކްޓަރުން މަސައްކަތް ފެށީ ފުރަތަމަ ކީމޯތެރަޕީ އާއި ރޭޑިއޭޝަންގެ ފަރުވާއިން ޓިއުމަރު ކުޑަކުރުމަށް ފަހު ސާޖަރީ ހެދުމަށެވެ. އެ ފަރުވާ ދިގުދެމިގެން ގޮސް ވަކި ހިސާބަކުން އާއިލާގެ މާލީ ހާލަތު ދަށްވުމާ ގުޅިގެން، ކީމޯ ފުރިހަމަ ކުރުމަށް ފަހުން މާލޭގެ އައިޖީއެމްއެޗަށް ބަދަލު ކުރެެވުނެވެ.
ނަސީމް ބުނި ގޮތުގައި ރާއްޖެ އައިސް އައިޖީއެމްއެޗުން ކީމޯ ދިނުމަށްފަހު ހަފްތާއަކަށް ރަށަށް ގޮސް ހުއްޓައި ޝަހީމްގެ ހާލު އިތުރަށް ގޯސްވެގެން ރަށު ސިއްހީ މަރުކަޒުގައި ބޭއްވުމަށް ފަހު، އެ ދުވަހު މާލެ ގެންދެވުނެވެ. އަދި އައިޖީއެމްއެޗްގައި 15 ވަރަކަށް ދުވަހު ބޭއްވުމަށް ފަހު އެމަޖެންސީ ކޭސް އެއްގެ ގޮތުގައި އިންޑިއާއަށް ގެންގޮސް އަމްރިތާ ހޮސްޕިޓަލްގައި ފަރުވާ ފެށި އެވެ. އޭރު ޝަހީމްގެ ހާލަތު ގޯސްވެ ކާން ދޭން ޖެހުނީ ހޮޅި ގުޅައިގެންނެވެ.
ޝަހީމްގެ ބަލި ހާލަތު އަންގައިދޭ ލިޔުމެއް
ނަސީމް ބުނީ އަމްރިތާ ހޮސްޕިޓަލުން ފަހުން ބޭބެއަށް އިތުރު ބޭހަކާއެކު ކީމޯ ދީ، ހޮސްޕިޓަލުގެ އެންމެ އެޑްވާންސް މެޝިނުން ރޭޑިއޭޝަން ވެސް ދީފައިވާ ކަމަށެވެ. އަދި އެ ހޮސްޕިޓަލުން އިތުރަށް ދެވޭނެ މާބޮޑު ފަރުވާއެއް ނެތް ކަމަށް ބުނުމުން، ޝަހީމް އަންނަ ބުދަ ދުވަހު ބެންގަލޫރުގެ މަނިޕާލް ހޮސްޕިޓަލަށް ބަދަލު ކުރުމަށް އާއިލާއިން ދަނީ މަސައްކަތްކުރަމުންނެވެ. ނަމަވެސް އަމްރިތާ ހޮސްޕިޓަލުން ފަރުވާ ހޯދުމަށް އާސަންދަ ހަމަޖައްސާފައިވާތީ، މަނިޕާލް ހޮސްޕިޓަލަށް ބަދަލުކޮށް ފަރުވާ ކުރިއަށް ގެންދިއުމަށް އާސަންދައިން ލިބެނީ ދެބައިކުޅަ އެއްބައި ހަރަދު ކަމުގައި ނަސީމް ފާހަގަކުރި އެވެ.
ޝަހީމަށް އިންޑިއާގައި ފަރުވާދެމުން ގެންދާތާ ގިނަ ދުވަސްތަކެއް ވެފައިވާއިރު، އޭނާގެ އެހީތެރިއަކަށް އާއިލާއިން މީހުން ފޮނުވުމުގައި ވެސް އުނދަގޫތަކެއް އެބަހުއްޓެވެ. އެގޮތުން މިހާރު އިންޑިއާގައި ހުރި އާއިލާގެ މެންބަރު ވެސް ހުރީ މުސާރަ ނުހިނގާ ގޮޮތަށް މަޑުކޮށްގެން ކަމުގައި ނަސީމް ފާހަގަކުރި އެވެ. އަދި ބައްޕައަކީ ވެސް ބަލި މީހަކަށް ވުމުން ބައްޕަ ބަލަން ޖެހޭނެތީ އިންޑިއާއަށް މީހުން ފޮނުވުމުގައި ދަތިތަކާ ކުރިމަތިވެފައިވާ ކަމަށް ނަސީމް ބުންޏެވެ.
ޝަހީމްގެ ބަލި ހާލަތު އަންގައިދޭ ލިޔުމެއް
ނަސީމް ބުނީ ގިނަ ދުވަސްތަކެއް ވަންދެން ރާއްޖެއިން ބޭރުގައި ބެބެއަށް ފަރުވާކުރަން ޖެހުމާ ގުޅިގެން ކެއިންބުއިމާއި ހުރުމަށް ވަރަށް ބޮޑު ހަރަދެއް ގޮސް، މިހާރު މާލީ ދަތިކަން އިންތިހާއަށް ބޮޑުވެފައިވާ ކަމަށެވެ. އަދި އިތުރު ފަރުވާއަށް އިންޑިއާގައި މަޑުކުރަން ޖެހޭނެ މުއްދަތެއް ނޭނގޭތީ އާއިލާއަށް ވަނީ އެންމެހައި ފަރާތްތަކުގެ އެހީތެރިކަން މުހިންމުވެފަ އެވެ.
ޝަހީމްގެ ފަރުވާއަށް އެހީ ހޯދުމަށް އެކި ފަހަރު މަތިން ހަރަކާތްތައް ހިންގާފައިވާއިރު، މިހާތަނަށް ހެޔޮއެދޭ އެކިއެކި ފަރާތްތަކުން ގިނަ އަދަދަކަށް ފައިސާގެ އެހީތެރިކަން ފޯރުކޮށްދީފައިވަކަން އާއިލާއިން ޝުކުރުވެރިކަމާއެކު ފާހަގަކުރެ އެވެ.
ޝަހީމް ހޮސްޕިޓަލްގައި އެޑްމިޓްކޮށްފައި
ނަސީމް ބުނި ގޮތުގައި ޝަހީމްގެ ބޭސްފަރުވާއަށް އެހީ ހޯދުމަށް ބޮޑުފޮޅުދޫ ކައުންސިލާއި، އެ ރަށުގެ މުއައްސަސާތަކާއި ޖަމިއްޔާތައް ގުޅިގެން މި ފެށޭ މަހުގެ 1 ވަނަ ދުވަހު ބޮޑު ފަންޑްރެއިސިންގ އިވެންޓެއް ބޭއްވުމަށް ވަނީ ހަމަޖެހިފަ އެވެ. އެ ހަރަކާތުގައި ރަށުގެ ރައްޔިތުންނާއި، އަތޮޅުގެ އެހެނިހެން ރަށްތަކުގެ މީހުންގެ އިތުރުން ހެޔޮއެދޭ އެންމެހައި ފަރާތްތަކުން ބައިވެރިވެ އެހީތެރިކަން ފޯރުކޮށްދިނުމަށް އާއިލާއިން ވަނީ އެދިފަ އެވެ.
ގުޅޭނެ ނަމްބަރު: 9315989 އިބްރާހީމް ނަސީމް (ޝަހީމްގެ ކޮއްކޮ)
9769737 އަބްދުﷲ ނާޝިފް (ޝަހީމްގެ އެއްބަނޑު އެއްބަފާ ދައްތަގެ ދަރި)
އެކައުންޓް ނަމްބަރު: ބީއެމްއެލް ދިވެހި ރުފިޔާ (7770000027823) އަބްދުﷲ ނާޝިފް
އެކައުންޓް ނަމްބަރު: ބީއެމްއެލް ޑޮލަރު (7770000010674) އަބްދުﷲ ނާޝިފް
