ވިލިމާލޭގައި ހުރި ގަހެއް ކައުންސިލަށް ނޭނގި ކެނޑިކަމަށް އެ ކައުންސިލުން ބުނީ އެ ގަސް ކަނޑާލާފައި ހުރި ފޮޓޯއެއް އާއްމުކޮށް މީހަކު ސޯޝަލް މީޑިއާގައި ކުރި ޕޯސްޓަކާއި ގުޅިގެންނެވެ.
އެކްސްގައި މީހަކު ކުރި ޕޯސްޓުގައި ބުނީ ވިލިމާލޭއިން އެއްވެސް ގަހެއް ނުކަނޑާނެކަަމަށް މާލޭގެ މޭޔަރު އާދަމް އާޒިމް މިމަހުގެ 9 ވަނަ ދުވަހު ވިދާޅުވިކަމަށެވެ. އެހެންނަމަވެސް ވިލިމާލޭގައި ހުންނަ ކުޑަކުދިންގެ ޕާކަކަށް ބޮޑު ހިޔާކަމެއް ގެނެސްދޭ ބޮޑު ގަހެއް ކަނޑާފައިވާކަމަށް ބުނެ އެ މަންޒަރުތައް އޭނާ ވަނީ އެކްސްގައި ހިއްސާކޮށްފައެވެ. ވިލިމާލޭއިން ގަސްކެނޑުން ސަރުކާރު ހިންގާ ޕީއެންސީގެ ކްއުންސިލަރުންނަށް މާ ބޮޑުކަމަށްކަށް ނުވާނެކަމަށާއި އެހެންނަމަވެސް އެމްޑީޕީގެ މެޖޯރިޓީ އޮވެ އެކަން ކޮށްފައިވާތީ ޕޯސްޓްކުރި މީހާ ވަނީ މާލޭ ސިޓީ ކައުންސިލަށް ފާޑުކިޔުންތައް އަމާޒުކޮށްފައެވެ.
މި ޕޯސްޓްކުރި މީހާ ވަނީ ގަސްކަނޑާލި ވަގުތު އެ މަގު ބަންދުކުރަން ހުއްދަދީ ސިޓީ ކައުންސިލްގެ ބޯޑު ޖަހާފައިވާތަން ފެންނަ ފޮޓޯއެއްވެސް ހިއްސާކޮށްފައެވެ.
ގަސް ކަނޑަމުންދިޔަ އިރު މަގު ބަންދުކުރުމުގެ ހުއްދަ ކައުންސިލުން ދިން ބޯޑު ބަހައްޓާފައި
މިކަމާއި ގުޅިގެން ކައުންސިލުން އެ ޕޯސްޓަށް ޖަވާބު ދެމުން ބުނެފައިވަނީ އެ ގަސް ކަނޑާލީ އެ ކައުންސިލުން ނޫންކަމަށެވެ. އަދި އެ ގަސް ކެނޑި މީހެއް ހޯދުމުގެ މަސައްކަތް ކުރަމުން އަންނަކަމަށްވެސް މާލޭ ސިޓީ ކައުންސިލުން ވަނީ ބުނެފައެވެ.
